Shymkenttik dárigerler salmaǵy 980 gr bop týǵan sábıdi aman alyp qaldy

ShYMKENT. KAZINFORM. Shymkentte salmaǵy nebári 980 gramm bop týǵan shaqalaq aman qaldy. Dárigerler onyń ómiri úshin 28 kún kúresken. 

39 jastaǵy júkti kelinshek №2 qalalyq aýrýhananyń perzenthana bólimine jetkizilip, jaǵdaıy aýyr bolǵandyqtan dárigerler kesar tiligin jasaǵan. Salmaǵy bir kelige de jetpeıtin ul balanyń jaǵdaıy aýyr bolǵan.

Dárigerler náresteni dereý jansaqtaý bólimine jatqyzyp, ókpeni jasandy jeldetý apparatyna qosyp, ınfýzıondy jáne ınotropty em sharalaryn júrgizgen. 

«Jansaqtaý bóliminde 28 kún jatqan Mustafa dárigerlerdiń sheshimimen náresteler patologııasy bólimine aýystyryldy. Ózdigimen dem ala bastady. Sábıdi dárigerler anasynyń qushaǵyna berdi. Qazirgi tańda balanyń salmaǵy 2700 gramm boldy. Jaǵdaıy qanaǵattanarlyq. Jaqyn arada ana men bala otbasymen qaýyshatyn bolady», - dedi qalalyq densaýlyq saqtaý basqarmasyndaǵylar. 

Eske salsaq, biz buǵan deıin elimizde «Ańsaǵan sábı» baǵdarlamasy arqyly 3 jylda 7 myń náreste dúnıege kelgenin jazǵan bolatynbyz. 

Shymkentte ár 15 mınýt saıyn 1 náreste jaryq dúnıe esigin ashatyny belgili bolǵan.