Shymkenttik dárigerler salmaǵy 700 gramm náresteni aman alyp qaldy
ShYMKENT. KAZINFORM – Shymkent qalalyq perınataldyq ortalyǵynyń dárigerleri júktiliktiń 26 aptasynda dúnıege kelgen, salmaǵy nebári 705 gramm sábıdiń ómirin aman saqtap qaldy.
Dárigerlerdiń aıtýynsha, anasy aýyr preeklampsııadan zardap shekkendikten, júktilik merziminen buryn aıaqtalǵan.
Óte az salmaqpen týǵan sábıdiń alǵashqy 56 kúni jansaqtaý bóliminde dárigerlerdiń jiti baqylaýynda boldy. Aq jeleńdiler 75 kún boıy balanyń ómiri úshin kúresip, zamanaýı medıtsınalyq tehnologııalar men dárilik preparattardy qoldandy. Qazirgi tańda Muhammad-Mýstafa esimdi sábı 2350 gramm salmaqpen úıine shyǵaryldy. Ol otbasyndaǵy ekinshi bala.
– Az salmaqpen týǵan balalardyń ómirin saqtaý úshin ana men dárigerler qanshama uıqysyz túnderdi ótkizedi. Biz úshin árbir balanyń aman qalýy – úlken jeńis. Shala jáne óte az salmaqpen týǵan balalardy emdeýde joǵary tehnologııalyq jabdyqtar men zamanaýı dári-dármekter qoldanylady. Barlyq medıtsınalyq kómek MÁMS júıesi arqyly kórsetiledi, – dedi qalalyq perınataldyq ortalyqtyń dáriger-neonatology Sapargúl Qojabaeva.
Jyl basynan beri ortalyqta 38 shaqalaq óte tómen salmaqpen dúnıege kelgen. Mundaı sábılerdiń ómirin saqtaý tek kásibı biliktilik pen zamanaýı medıtsınalyq quraldardyń arqasynda ǵana múmkin.
Budan buryn elimizdegi alǵashqy keńirdek bıfýrkatsııasynyń otasy Shymkentte jasalǵanyn jazǵan edik.