Shymkenttik áıeldiń blefaroplastıkadan keıin bir kózi kórmeı qaldy
ASTANA. KAZINFORM — Shymkentte tıisti sertıfıkaty men lıtsenzııasy bolmaı, plastıkalyq hırýrgııamen aınalysqan azamat sottaldy. Ol jasaǵan blefaroplastıka operatsııasynan keıin patsıenttiń bir kózi kórmeı qalǵan.
Bas prokýratýranyń habarlaýynsha, sottalýshy medıtsınalyq qyzmet kórsetýge qajetti ruqsat qujattary men tıisti maman sertıfıkaty bolmaǵanyna qaramastan, plastıkalyq hırýrgııa salasynda qyzmet kórsetken. Operatsııadan keıin jábirlenýshiniń bir kóziniń kórý qabileti tolyq joǵalǵan.
— Sot ony Qazaqstan Respýblıkasy Qylmystyq kodeksiniń 322-baby 2-bóligi boıynsha kináli dep tanydy. Oǵan 1 jyl 6 aı bas bostandyǵynan aıyrý jazasy taǵaıyndaldy. Sonymen qatar, sottalýshy 3 jyl boıy medıtsınalyq jáne farmatsevtıkalyq qyzmetpen aınalysý quqyǵynan aıyryldy, — delingen habarlamada.
Abaı aýdanynyń prokýratýrasy lıtsenzııasy men tıisti biliktiligi joq adamdardan medıtsınalyq qyzmet alý aýyr zardaptarǵa ákelýi múmkin ekenin eskertti.
Eske salaıyq, buǵan deıin Almatyda júkti áıelge bir mezgilde eki ota jasalǵanyn habarlaǵan edik.
