Shymkenttik áıel kórshisiniń alty balasyn órtten aman alyp qaldy
Shymkent turǵyny órtenip jatqan úıge kirip, kórshisiniń alty balasyn aman alyp qaldy. Bul týraly Kazinform Otyrar-ǵa silteme jasap habarlaıdy.
Órt 16 jeltoqsanǵa qaraǵan túni bolǵan. Anasy balalaryn uıyqtatyp, ózi ketip qalǵan. Qaraýsyz qalǵan balalar uıyqtamaı, otpen oınaǵan.
- Qutqaryp qalǵan áıel úıden kámeletke tolmaǵan alty balany shyǵaryp, erlik kórsetti. Órttiń shyǵýyna balalardyń otqa abaısyz qaraýy sebep boldy, - dedi Shymkent qalalyq Tótenshe jaǵdaılar departamenti bastyǵynyń orynbasary Erkin Otarǵalymuly.
Onyń óziniń tórt balasy bar, órtti kórgende úıden jalańaıaq júgirip shyǵyp, úsh metrlik qorshaýdan asyp ketkenin aıtady. Al úıdegi gaz ballonyn baıqaǵan ol kúıeýin kómekke shaqyrǵan.
- Balalardyń jylaǵanyn estip, júgirip shyqtym, úılerimiz bir-birine óte jaqyn ornalasqan. Úıde kez kelgen mınýtta jarylyp ketýi múmkin gaz ballony boldy,- deıdi Shymkent turǵyny.
Qalalyq TJD áıeldi erligi men qaharmandyǵy úshin joǵary marapatqa usyný úshin mınıstrlikke qujattary jiberilgenin habarlady.
