Shymkenttik Alına Rı Miss Universe baıqaýynda Qazaqstan atynan óner kórsetedi: ol týraly ne belgili

Miss Qazaqstan 2025 jáne Miss Universe Kazakhstan 2026 atanǵan arý halyqaralyq baıqaýǵa jyl boıy daıyndalǵan. Alınanyń basty maqsattarynyń biri – Qazaqstan atynan shyǵyp, úzdik 30 qatysýshynyń qatarynda bolý.

Shymkentten álemdik sahnaǵa deıin

Alına Shymkentte dúnıege kelgen, jasy 22-de. Ol otbasyndaǵy jalǵyz bala. 16 jasynan bastap Almatyǵa túsirilimder men túrli is-sharalar úshin jıi kelip júrgen. Keıin megapolıske birjola kóshti.

Bilimi boıynsha Alına – zańger. Alaıda bolashaqta osy salada jumys isteýdi josparlap otyrǵan joq. Onyń ónerge degen qyzyǵýshylyǵy bala kezinen bastalǵan, úsh jasynan bastap gımnastıkamen, bal bıimen, halyq jáne zamanaýı bılermen aınalysqan. Sonymen qatar vokalmen de shuǵyldanǵan.

Ulttyq baıqaýda jeńiske jetkennen keıin onyń ómiri túbegeıli ózgerdi. Alınanyń aıtýynsha, jeńispen birge úlken jaýapkershilik te júkteldi. Endi ol álemdik sahnada Qazaqstan atynan óner kórsetýge daıyndalýy kerek edi.

- Jeńiske jetkennen keıin qyzý daıyndyq bastaldy. Men bul kezeńge óte jaýapkershilikpen qaradym. Jyl boıy tyńǵylyqty daıyndalyp, jattyqtym, sóıleý mánerim men júris-turysyma kóńil bóldim, – dedi Alına.

Daıyndyq barysynda ol sportzaldaǵy jattyǵýlarǵa, stretchıng jáne akterlik sheberligin damytýǵa da ýaqyt bólgen.

Maqsat – Qazaqstandy úzdik 30 eldiń qataryna qosý

Miss Universe baıqaýy 1952 jyldan beri ótkizilip keledi. 2026 jyly onyń 75-mereıtoılyq kezeńi ótedi. Bıyl baıqaý Pýerto-Rıkoda uıymdastyrylady. Bul elde konkýrs 20 jyldan astam ýaqyttan keıin qaıta ótkizilmek. Tájge álemniń 100-den astam eli men aýmaǵynan kelgen qatysýshylar talasady.

Alına úshin bul baıqaýǵa qatysý – jeke jetistik qana emes. Ol Qazaqstan úshin mańyzdy nátıje kórsetýdi maqsat etip otyr.

- Qazaqstandy aqyry úzdik 30 qatysýshynyń qataryna qosqym keledi. Meniń tilegim de, maqsatym da – óz mıssııamdy oryndap, Qazaqstan úshin tarıhı sáttiń bolýyna úles qosý. Sondyqtan bar kúshimdi salyp daıyndalyp jatyrmyn. Maǵan búkil Qazaqstannyń qoldaýy qajet, – dedi ol baspasóz konferentsııasynda.

Qazaqstan atynan qatysatyn arý Pýerto-Rıkoǵa 4 qarashada ushady. Baıqaýdyń negizgi baǵdarlamasy qarasha aıynda ótedi.

30 kelilik ulttyq kıim

Alınanyń Miss Universe sahnasynda tanystyratyn ulttyq kıimi de kópshiliktiń qyzyǵýshylyǵyn týdyryp otyr. Uıymdastyrýshylardyń málimetinshe, oǵan 5 mıllıon teńgeden astam qarajat jumsalǵan.

Alına kıim úlgisin ózi oılap tapqan kórinedi. Oǵan Qazaqstannyń memlekettik týy shabyt bergen. Ulttyq obrazda kók týymyzdyń túsi, qazaqy oıý-órnekter, kún men qyran beınesi bar. Sondaı-aq tastarmen jáne oıý-órnektermen bezendirilgen uzyn shleıf bolady.

Kıimniń eń erekshe bólikteriniń biri – arnaıy mehanızm arqyly ashylatyn úlken qanattar. Bas kıimine de kún pishinindegi element ornatylady. Búkil qurylymnyń salmaǵy shamamen 30 keli bolady.

- Bul – tolyǵymen ózim oılastyrǵan obraz. Eskızin de ózim ázirledim. Bizdiń týymyzdyń taqyrybyn negizge alý kerek dep sheshtim. Bul – óte sımvolıkalyq ári patrıottyq ıdeıa, – dedi Alına.

Kıimniń kólemi men salmaǵyna baılanysty ony Pýerto-Rıkoǵa júk ushaǵymen bólek jetkizý josparlanyp otyr.

Sán, shyǵarmashylyq jáne jeke brend

Alınanyń sánge degen qyzyǵýshylyǵy bala kezinen bastalǵan. Ol kishkentaıynan kóılekterdiń sýretin salǵandy unatady. Miss Universe baıqaýynan keıin óz kıim brendin ashý múmkindigin qarastyryp júr.

Onyń oıynsha, bul etnıkalyq naqyshtaǵy kıimderden turatyn shaǵyn ári eksklıýzıvti toptama bolýy múmkin. Alına kıimderdiń dızaınyn ózi ázirlep, shekteýli mólsherde shyǵarǵysy keledi.

- Bala kezimnen kóılekterdiń sýretin salǵandy jaqsy kóretinmin. Biraq nege ekenin bilmeımin, dızaın mamandyǵyna túspedim. Baıqaýdan keıin óz brendimdi ashýym múmkin. Onda kóılektermen qatar, etnıkalyq naqyshtaǵy kostıýmder de bolady. Qazirdiń ózinde birneshe qyzyqty ıdeıam bar. Biregeı kıimderdi shekteýli mólsherde shyǵarǵym keledi. Men sándi jaqsy kóremin, ózgelerge uqsamaıtyndaı kıingendi unatamyn, óz talǵamym bar. Sol ıdeıalarymdy kıim úlgileri arqyly júzege asyrǵym keledi, – dep bólisti Alına.

Onyń qyzyǵýshylyqtary sánmen ǵana shektelmeıdi. Alına fortepıanoda oınaǵan, tennıske áýes. Bos ýaqytyn otbasymen jáne jaqyndarymen ótkizýge tyrysady. Ata-anasy Shymkentte turady. Alınanyń sózinshe, olar onyń sulýlyq baıqaýlaryna qatysqanyn únemi qoldap keledi.

Nıý-Iorkte Qazaqstan atynan óner kórsetti

Miss Universe baıqaýyna attanbas buryn Alına halyqaralyq sán alańynda da Qazaqstannyń atyn tanytyp úlgerdi. Qyrkúıek aıynda ol New York Fashion Week 2026 is-sharalaryna qatysty.

Alınanyń aıtýynsha, oǵan ózge elderdiń ókilderimen birge sán kórsetilimine qatysýǵa shaqyrtý kelgen. Keıin ol model retinde de podıýmǵa shyqqan.

Endi ony basty synaq – Miss Universe baıqaýy kútip tur. Alına daıyndyqtyń ońaı bolmaǵanyn jasyrmaıdy. Degenmen álemdegi eń iri halyqaralyq sahnalardyń birinde Qazaqstannyń atynan óner kórsetý múmkindigin erekshe jaýapkershilik dep sanaıdy.

- Men Miss Universe baıqaýyn bala kezimnen kórip óstim. Endi jaqynda sol jaqqa ushyp baryp, elimniń atynan óner kórsetetinime áli de sene alar emespin. Men bul jetistigimmen maqtan tutamyn, – dep túıindedi ol.

Miss World 2026 baıqaýyna Qazaqstan atynan kim qatysatynyn jazǵan edik.