22 jastaǵy shymkenttik arý Miss Qazaqstan 2025 atandy
ALMATY. KAZINFORM — Almatyda ulttyq Miss Qazaqstan 2025 sulýlyq baıqaýynyń fınaly ótti.
Qatysýshylar osy fınalǵa jetý úshin birneshe irikteýden ótken. Fınaldyq shoý klassıkalyq sulýlyq baıqaýlarynyń formatymen qatar, jańa jáne zamanaýı elementterdi de biriktirdi. Qyzdar sahnaǵa qyrǵyzstandyq dızaıner ázirlegen ulttyq kostıýmdermen shyqty. Ol — Miss Qazaqstan jobalarynyń turaqty dızaıneri.
Fınalda erekshe kózge túsken detal — kók tús aıryqsha mánge ıe boldy. Bul tús erkindikti, ishki kúshti, ashyq minezdi jáne óz jolyna degen senimdilikti bildiredi.
Qazylar alqasy birneshe týrdyń qorytyndysy boıynsha jeńimpazdardy anyqtady.
Miss Qazaqstan 2025 tájin shymkenttik 22 jastaǵy Alına Ekaterıncheva (Rı) ıelendi.
Alına úsh jasynan beri bı bıleıdi. Ol osy ýaqyt ishinde talaı sahnada óner kórsetip, ózine degen senimdiligi pen kórermen aldynda erkin turý qabiletin shyńdaǵan.
Oǵan 14 jasynda alǵash ret modeldik usynystar túsip, sodan beri sán kórsetilimderi men jarnamalyq túsirilimderge qatysyp keledi.
Alına shyǵarmashylyqqa jaqyn bolsa da, zań salasy boıynsha bilim alǵan. Alaıda onyń júregi sán álemine tartady. Ol bolashaqta kıim dızaıny mamandyǵyna oqýǵa túsip, jeke brendin qurǵysy keledi. Endi ol Qazaqstannyń namysyn 2026 jyly ótetin álemdegi eń bedeldi sulýlyq baıqaýlarynyń biri — Miss Universe jarysynda qorǵaıdy.
Miss World Qazaqstan 2025 ataǵyn Shadııara Baıkenova ıelendi. Ol 2026 jylǵy Miss World baıqaýyna elimizdiń atynan qatysady. Shadııara — Júrgenev atyndaǵy óner akademııasynda «Arhıtektýralyq dızaın» mamandyǵy boıynsha 4-kýrsta oqıdy.
Shadııara jeti jyldan beri akademııalyq sýret salýmen aınalysady. Sonymen birge bımen de, fortepıanomen de shuǵyldanady. Ol keıingi eki jylda arhıtektor bolyp jumys istep júr. Qazir onyń ázirlegen alǵashqy jobasy — meıramhana, qonaqúı jáne dúkennen turatyn keshen salynyp jatyr. Sonymen qatar ol model retinde eldegi sán kórsetilimderine qatysady.
Onyń sózinshe, naǵyz myqtylyq — qıyn kezde berilmeı, shúkir etip, tózimmen alǵa qarap, qarańǵy sátterdiń ózinen de jaryqty kóre bilý.
Baıqaýda ózge de nomınatsııalar boıynsha jeńimpazdar anyqtaldy:
• Miss People’s Choice (kórermen kózaıymy) — Alına Nurahmetova;
• Miss Adalin Clinic — Aıda Janqylysh;
• Miss Dress Angel — Laýra Aqtaeva;
• Birinshi vıtse-mıss Qazaqstan jáne Miss Marie Claire — Dilnaz Sársenbaı;
• Miss Sun Group — Dıana Sanat;
• Ekinshi vıtse-mıss Qazaqstan — Kámıla Dáýletova;
• Miss Grand Qazaqstan — Ánel Emel (2026 jyly Miss Grand International baıqaýynda Qazaqstan namysyn qorǵaıdy).