Shymkentten jumys kúshi az óńirlerge 400-den astam adam kóshýge nıet bildirip otyr
ShYMKENT. KAZINFORM — Shymkent qalasynda óńiraralyq bos jumys oryndary jármeńkesi ótip, onda 8 myńnan astam bos jumys orny usynyldy. Onyń ishinde 4 myńnan astamy óńirlerden kelgen delegattar tarapynan tanystyryldy.
Bos jumys oryndar jármeńkesine Pavlodar, Soltústik Qazaqstan, Qaraǵandy, Abaı, Shyǵys Qazaqstan jáne Ulytaý oblystarynan kelgen delegattar qatysyp, óńiraralyq jumyspen qamtý tetikteri, erikti qonys aýdarý baǵdarlamalary, sondaı-aq óńirlerdiń geografııalyq erekshelikteri men áleýmettik-ekonomıkalyq múmkindikteri jóninde aqparat berdi.
Shymkent qalasy jumyspen qamtý jáne áleýmettik qorǵaý basqarmasynyń málimetinshe, jármeńke qorytyndysy boıynsha 422 azamat eldiń jumys kúshi tapshy óńirlerine qonys aýdarýǵa nıet bildirdi. Onyń ishinde 8 adam probatsııa esebinde tirkelgen.
— Shyǵys Qazaqstan oblysyna kóshýge 200 azamat qyzyǵýshylyq tanytyp otyr. Ulytaý oblysyna 50 adam barýǵa qulshynys bildirdi. Sonymen qatar Pavlodar oblysyna 40, Soltústik Qazaqstan oblysyna 72, Abaı oblysyna 60 azamat qonys aýdarýǵa yqylas tanytty, — delingen vedomstvo taratqan aqparatta.
Budan buryn jyl basynan beri Shymkent qalasynan 48 otbasy erikti túrde qonys aýdarý baǵdarlamasy aıasynda eldiń eńbek kúshi tapshy óńirlerine kóshkenin jazǵan edik.
