Shymkentten Astanaǵa ushyp kelgen ushaqqa qustar soqtyǵysyp qaldy

ASTANA. KAZINFORM – Qustardyń soqtyǵysyp qalýynan ushaqtyń bólshegi zaqymdaldy. Bul týraly SCAT áýe kompanııasynyń baspasóz qyzmeti habarlaıdy. 

— «Shymkent — Astana» áýe reısi qonǵan kezde ushaqpen qustar soqtyǵysyp qaldy. Ushaqtyń zaqymdalǵan bólshegin aýystyrýǵa baılanysty, kútý kerektigin eskerte otyryp, «Astana — Shymkent» baǵyty boıynsha ushýy tıis jolaýshylar qonaqúıge ornalastyrylyp, tamaqpen qamtyldy, — delingen habarlamada.

Osy oraıda atalǵan áýe kompanııasy basty basymdyq — jolaýshylardyń qaýipsizdigi ekenin habarlap otyr.

— Kompanııa qustardyń ushý baǵytyna áser ete almaıdy, sondyqtan osyndaı jaǵdaıda reıs kestesiniń ózgerýine túsinistikpen qaraýlaryńyzdy suraımyz, — deıdi áýe kompanııasynan.

Aıta ketsek, qustardyń kesirinen ushaqtyń qaıta qonýy, keshigýi bolyp turatyn jaıt. Birneshe jyl buryn Atyraýdan elordaǵa baǵyt alǵan ushaq qustardyń kesirinen áýejaıǵa qaıta qonǵan edi. 

Odan bólek, Almatydan elordaǵa bet alǵan ushaq qozǵaltqyshyna qustar túsken.