Shymkentten 600-ge jýyq adam jumys kúshi jetispeıtin óńirlerge kóshti
ShYMKENT. KAZINFORM – Shymkentten eńbek kúshi tapshy óńirlerge qonys aýdarýshylardyń qatary artyp keledi. Jyl basynan beri qaladan 143 otbasy, ıaǵnı 586 adam basqa oblystarǵa kóshken.
Shymkent qalalyq jumyspen qamtý jáne áleýmettik qorǵaý basqarmasynyń málimetinshe, 2026 jyldyń 8 aıynda qonys aýdarǵandardyń basym bóligi Soltústik Qazaqstan, Pavlodar jáne Shyǵys Qazaqstan oblystaryn tańdaǵan.
Atap aıtqanda, Pavlodar oblysyna – 44 otbasy, 167 adam, Soltústik Qazaqstan oblysyna – 49 otbasy, 226 adam, Qostanaı oblysyna – 16 otbasy, 62 adam, Qaraǵandy oblysyna – 2 otbasy, 8 adam, Abaı oblysyna – 2 otbasy, 9 adam, Shyǵys Qazaqstan oblysyna – 28 otbasy, 105 adam, Ulytaý oblysyna 2 otbasy, 9 adam qonystanǵan.
Jańa óńirge kóshkenderdiń 336-sy balalar bolsa, 170-i – eńbekke qabiletti azamattar, 80-i – úı sharýasyndaǵylar.
Shymkent qalalyq eńbek mobıldiligi ortalyǵynyń dırektory Baǵdat Arqabaevtyń aıtýynsha, erikti túrde qonys aýdarý baǵdarlamasy aıasynda memleket tarapynan ár otbasy múshesine 70 AEK kóleminde qarjylaı qoldaý kórsetiledi.
– Budan bólek, qonys aýdarǵan óńirlerde kásipkerler tarapynan demeýshilik kómek kórsetiledi. Keıbir óńirlerde mal berilse, endi birinde jer telimi bólinedi. Bul azamattarǵa egin egip, kásibin damytýǵa múmkindik beredi, – dedi Baǵdat Arqabaev.
Onyń aıtýynsha, 2025 jyly klımattyq jaǵdaıǵa baılanysty bir otbasy Shymkentke oralǵan. Bıyl ázirge mundaı jaǵdaı tirkelmegen.
Buǵan deıin Túrkistan oblysynan 2026 jyldyń basynan beri baǵdarlama aıasynda 288 otbasy, ıaǵnı 1322 adam kóshkenin jazǵan edik.
