Shymkentten 200-den astam adam jumys kúshi tapshy óńirlerge kóshti
ShYMKENT. KAZINFORM — Jyl basynan beri Shymkent qalasynan 48 otbasy erikti túrde qonys aýdarý baǵdarlamasy aıasynda eldiń eńbek kúshi tapshy óńirlerine kóshti. Barlyǵy 206 adam qonys aýdarǵan.
Qonys aýdarýǵa eń belsendi qatysqan — Qarataý aýdanynyń turǵyndary. Bul aýdannan 27 otbasy (113 adam) kóshken. Al Abaı aýdanynan 12 otbasy (46 adam) baǵdarlamaǵa qatysqan. Ál-Farabı jáne Eńbekshi aýdandarynan úsh otbasydan (jalpy 32 adam), sondaı-aq Turan aýdanynan úsh otbasy (15 adam) qonys aýdardy.
Qalalyq jumyspen qamtý jáne áleýmettik qorǵaý basqarmasynyń málimetinshe, Shymkentten kósh túzegen azamattardyń basym bóligi Soltústik Qazaqstan oblysyn tańdaǵan. Bul óńirge 20 otbasynyń 92 múshesi kóshken.
— Sonymen qatar Qostanaı oblysyna 10 otbasydaǵy 40 adam, Pavlodar oblysyna jeti otbasynyń 31 múshesi turaqtady. Shyǵys Qazaqstan oblysyna segiz otbasynyń 30 adamy, Qaraǵandy oblysyna eki otbasynyń segiz adamy, al Abaı oblysyna bir otbasynyń bes múshesi qonystandy, — dep habarlady vedomstvo.
Qonys aýdarýshylardyń ishinde balalardyń úlesi basym — 112 adam. Eńbekke qabiletti azamattar sany 67 bolsa, 27 adam úı sharýasymen aınalysady.
Jaýapty sala ókilderiniń málimdeýinshe, turǵyndardyń memlekettik baǵdarlamaǵa degen qyzyǵýshylyǵy joǵary.
— Qala turǵyndary arasynda erikti túrde qonys aýdarý baǵdarlamasy boıynsha túsindirý jumystary turaqty júrgizilip keledi. Baǵdarlama eńbek kúshi artyq óńirlerden kadr tapshylyǵy bar aımaqtarǵa jumys kúshiniń utqyrlyǵyn arttyrýǵa baǵyttalǵan. Jumyspen qamtý ortalyqtarynyń mamandary qala ishinde de, shalǵaıdaǵy turǵyn alaptarda da aqparattyq kezdesýler ótkizedi, — dedi qalalyq jumyspen qamtý jáne áleýmettik qorǵaý basqarmasynyń basshysy Janat Ýtebaeva.
Memleket tarapynan qonys aýdarýshylarǵa jan-jaqty qoldaý kórsetiledi. Birjolǵy tólem ár otbasy múshesine 70 AEK mólsherinde qarastyrylǵan. 2026 jyly onyń kólemi bir adamǵa — 302 750 teńge. Sonymen qatar bir jyl ishinde jalǵa alynǵan turǵyn úı men kommýnaldyq qyzmetterge jumsalǵan shyǵyndar óteledi, ıaǵnı qalalyq jerlerde — 86 500-129 750 teńge, al aýyldyq jerlerde — 64 875-90 825 teńge. Budan bólek, qandastar men qonys aýdarýshylarǵa turǵyn úı satyp alý úshin sertıfıkat beriledi. Ol turǵyn úı qunynyń 50 paıyzyna deıin qamtıdy, biraq 1625 AEK-ten aspaıdy. Bul shamamen — 7 mln teńge.
Budan buryn 2025 jyly Shymkentten 660-den astam azamat jumys kúshi tapshy óńirlerge kóshkenin jazǵan edik. Olardyń basym bóligi Pavlodar oblysyn tańdaǵan.
