Shymkentten 1200-den astam azamat áskerge shaqyrylady
ShYMKENT. KAZINFORM – Shymkentte kóktemgi áskerge shaqyrý naýqany bastaldy. Qazirdiń ózinde 100-den astam jas Shekara qyzmetine attandy.
Bıyl Shymkentte kóktemgi áskerge shaqyrý naýqany 17 naýryzda bastalǵan. Eki aptaǵa jýyq ýaqyt ishinde Shekara qyzmetine 100-den astam azamat Otan aldyndaǵy boryshyn óteý úshin jol tartty. Olar Jambyl, Almaty, Shyǵys Qazaqstan oblystaryna jiberildi.
Shymkent qalasy qorǵanys isteri jónindegi departamentiniń bastyǵy, polkovnık Ábdiǵabıt Shegebaevtyń aıtýynsha, naýryz-maýsym aılarynda qala boıynsha 1200-den astam azamatty áskerge shaqyrý josparlanǵan.
– Onyń 150-ge jýyǵy UQK Shekara qyzmetine, 20 azamat Memlekettik kúzet qyzmetine, 700-ge jýyq adam Qarýly kúshter qataryna jiberiledi. Sonymen qatar TJM men ІІM Ulttyq ulan qataryna 18-27 jas aralyǵyndaǵy azamattardy shaqyrý kózdelgen. Kelesi aptada Shekara qyzmetine shaqyrý aıaqtalyp, Qarýly kúshterge qabyldaý bastalady, – dedi ol.
Spıkerdiń aıtýynsha, áskerge shaqyrý endi tek qaǵaz túrinde emes, SMS habarlama nemese elektrondy úkimet portaly arqyly da jiberiledi. Belgilengen merzimde dáleldi sebepsiz kelmegender ákimshilik jaýapkershilikke tartylady, al áskerden qasaqana jaltarǵandarǵa qylmystyq jaýapkershilik qarastyrylǵan.
– Kóktemgi áskerı shaqyrý aıasynda 1 qańtardan 28 aqpanǵa deıin zerdeleý jumystary júrgizildi. Qazirgi tańda tizimdegi 4033 azamatpen jumys atqarylyp jatyr. Kelmegenderdi izdestirý polıtsııa departamentine júkteledi. Olardy tabý, úıine barý jáne jınaq beketine jetkizý – polıtsııanyń mindeti. Mundaı jaǵdaıda azamattar ákimshilik jazaǵa tartylyp, Qylmystyq kodekstiń 387-babyna sáıkes jaýap beredi, – dedi Ábdiǵabıt Shegebaev.
Sondaı-aq merzimdi áskerı qyzmet ótkergenderge memleket tarapynan birqatar jeńildikter qarastyrylǵan. Atap aıtqanda, olar joǵary oqý oryndaryna túsý múmkindigine ıe bolady jáne nesıe tólemderin keıinge shegere alady. Qazirgi tańda Shymkentten áskerge attanǵan 80-ge jýyq jas eldiń ár óńirinde UBT-syz joǵary oqý oryndarynda bilim alyp jatyr.
Eske salaıyq, bıyl 30 maýsymǵa deıin 18-27 jas aralyǵyndaǵy 21 myńnan astam azamat Qarýly kúshterdiń, basqa da áskerı qurylymdardyń qataryna shaqyrylady.