Shymkenttegi jańa stadıon qurylysy nege uzaqqa sozylyp ketti
ShYMKENT. KAZINFORM – Shymkentte jańa stadıonnyń qurylysyna qatysty áleýmettik jelide aıtylǵan synı pikirlerge qala ákimdigi túsinik berdi.
Shymkentte 35 myń kórermenge arnalǵan jańa stadıonnyń qurylysy eki jyl buryn bastalǵan. 2024 jylǵy maýsymda stadıonnyń irgetasy qalanyp, nysandy 2026 jyldyń ortasyna deıin aıaqtaý josparlanǵan edi.
Áleýmettik jelide Shymkentte salynyp jatqan jańa stadıonǵa bólingen jer telimderiniń zańdylyǵyna jáne bıýdjet qarajatynyń jumsalýyna qatysty synı materıaldar jarııalandy.
Qala ákiminiń orynbasary Sársen Quranbektiń aıtýynsha, jańa stadıondy salý úshin memleket muqtajyna 190 jer ýchaskesi alynǵan. Ár ýchaskeniń kólemi shamamen 8 sotyq bolǵan. Ol áleýmettik jelide jalpy quny 200 mln teńge bolatyn jer telimderi qala ákimdigi tarapynan on ese qymbatqa satyp alynǵany týraly aqparatqa qatysty túsinikteme berdi.
– Bul – shyndyqqa janaspaıdy. Memleket muqtajy úshin jer alý kezinde aldymen táýelsiz baǵalaý kompanııasy onyń qunyn anyqtaıdy, – dedi Sársen Quranbek.
Onyń aıtýynsha, jalpy shamamen 2100 sotyq jer ýchaskesi satyp alynǵan. Ár sotyqtyń quny 1,4 mln teńgeden 1,8 mln teńgege deıin belgilengen. Keıbir jer ıeleri baǵalaý qorytyndysymen kelispeı, sotqa júgingen. Máselen, 8 sotyq jer ýchaskesi baǵalaýshylar tarapynan 14 mln teńgege baǵalanǵan. Alaıda jer ýchaskesiniń ıesi sotqa júginip, onyń qunyn 20 mln teńgege deıin qaıta qaratyp, qosymsha ótemaqy óndirip alǵan.
Ákimdiktiń resmı ókili stadıon qurylysyna qajetti jer telimderin baǵalaý jáne memleket muqtajyna alý barysynda ákimdik tarapynan zań buzýshylyqqa jol berilmegenin atap ótti.
Sondaı-aq ol atalǵan aýmaqtaǵy jer telimderiniń nysanaly maqsaty birneshe ret ózgertilgeni týraly áleýmettik jelide taraǵan aqparatty da joqqa shyǵardy.
– Bul jerlerdiń nysanaly maqsaty Shymkent respýblıkalyq mańyzy bar qala mártebesin alǵanǵa deıin, ıaǵnı burynǵy Saıram aýdanynyń quramynda bolǵan kezeńde ózgertilgen. 2018 jyly Shymkent respýblıkalyq mártebe alǵannan beri bul jerlerdiń nysanaly maqsaty birde-bir ret ózgergen joq, – dep túsindirdi ákimdik ókili.
Alǵashqy jobada jańa stadıonnyń syıymdylyǵy 35 myń orynǵa josparlanǵan. Nysannyń bastapqy merdigeri «Qazaq Stroy» kompanııasy bolǵan. Alaıda merdiger jobany belgilengen merzimde júzege asyra almaǵan. Osyǵan baılanysty qurylys merdigeri ózgertilgen.
– Eger ÝEFA jáne FIFA deńgeıindegi joǵary sanattaǵy halyqaralyq jarystardy ótkizýdi josparlasaq, stadıonnyń syıymdylyǵy 50 myń orynnan kem bolmaýy kerek. Osyǵan baılanysty Shymkenttegi jańa stadıondy 60 myń orynǵa deıin ulǵaıtý týraly sheshim qabyldandy, – dedi qala ákimdigi ókili.
Qazirgi tańda 35 myń orynǵa arnalǵan jobaǵa ózgerister engizilip jatyr. Negizgi irgetas jumystary saqtalady, al stadıonnyń joǵarǵy qurylymdyq bóligi 60 myń kórermenge eseptelip qaıta jasalady.
– Jobanyń bastapqy 35 myń orynǵa arnalǵan bóligi bıýdjet qarajaty esebinen qarjylandyrylady. Al syıymdylyqty 60 myń orynǵa deıin arttyrýǵa baılanysty qosymsha shyǵyndy búginde «Ordabasy» fýtbol klýbynyń ıesi bolyp otyrǵan «Integra» kompanııasy óz esebinen óteıdi, – dedi spıker.
Ákimdik bul bastamany memlekettik-jekeshelik áriptestik aıasyndaǵy joba retinde baǵalap otyr.
Buǵan deıin jańa stadıonnyń qurylys jumystary jospardan keshikkeni habarlanǵan bolatyn. Ákimdik muny nysanǵa qajetti qosymsha 6,24 gektar jer telimin memleket muqtajyna alý rásiminiń uzaqqa sozylýymen túsindirgen edi.
