Shymkenttegi ýnıversıtette asa iri kólemde bıýdjet qarajatyn jymqyrǵandar ustaldy
ShYMKENT. KAZINFORM – QMA Shymkent qalasy boıynsha departamenti M.Áýezov atyndaǵy Ońtústik Qazaqstan ýnıversıtetinde asa iri kólemde bıýdjet qarajatyn jymqyrý jáne qylmystyq jolmen alynǵan múlikti zańdastyrý faktisi boıynsha qylmystyq isti tergep-tekserýdi aıaqtady.
Agenttiktiń málimetinshe, kúdiktiler qatarynda rektordyń mindetin atqarýshy, qarjy jáne ákimshilik departamentterdiń dırektorlary, sondaı-aq seriktes uıymdardyń basshylary bar.
Tergeý nátıjesinde ýnıversıtet qyzmet kórsetý, qurylys-montaj jumystary men taýar jetkizýge qatysty jalpy somasy 256 mln teńge bolatyn jalǵan kelisimsharttar jasaǵany anyqtaldy.
Atalǵan jumystar is júzinde oryndalmaǵan. Bıýdjet qarjysy jalǵan aktiler negizinde baılanysy bar kompanııalardyń shottaryna aýdarylyp, keıin qolma-qol aqshaǵa aınaldyrylǵan.
Qylmystyq jolmen alynǵan kiristerge kúdiktiler 6 qymbat kólik (Mercedes-Benz S-klass, Lexus LX570 jáne t.b.) pen Shymkent qalasynyń ortalyǵynan quny 254 mln teńge bolatyn elıtalyq kottedj satyp alǵan. Olarǵa sot sanktsııasymen tyıym salyndy. 4 kúdiktige qatysty úıqamaq túrindegi bultartpaý sharasy qabyldandy.
Qylmystyq is sotqa joldandy.
Aıta keteıik, Atyraý oblysynda bilim mekemelerindegi qarjy jymqyrý deregi onlaın baqylanady.