Shymkenttegi túzeý mekemesinde sottalǵandar tigin, jıhaz jáne ózge óndiris salalaryna tartyldy
ASTANA. KAZINFORM – Shymkent qalasy men Túrkistan oblysy boıynsha qylmystyq-atqarý júıesi mekemelerinde sottalǵandardy eńbekpen qamtý baǵytyndaǵy jumystar kúsheıtilip jatyr, dep habarlaıdy prokýratýra.
Memleket basshysynyń tapsyrmalaryn oryndaý maqsatynda sottalǵandardyń túzelýine jáne qoǵamǵa qaıta beıimdelýine jaǵdaı jasaýǵa baǵyttalǵan sharalar turaqty túrde júrgizilýde.
Osy baǵytta Mamandandyrylǵan prokýratýranyń bastamasymen Shymkent qalasy jáne Túrkistan oblysy boıynsha QAJ departamentine qarasty №55 mekemesinde jańa óndiristik alańdar ashylyp, kásipkerlermen birlesken jobalar iske asyrylyp jatyr.
– Qazirgi tańda mekemedegi eńbekke jaramdy sottalǵandardyń basym bóligi aqyly eńbekpen qamtylǵan, – delingen habarlamada.
Atap aıtqanda, «Shveınyı mır KDM» JShS tigin óndirisin iske qosqan. Jeke kásipker «Detsıev» jıhaz óndirý tsehynyń jumysyn jolǵa qoısa, «Mır park» JShS balalar oıyn alańdaryn óndirý jáne ornatý jobasyn júzege asyrýda. Al «Dana» jeke kásipkerligi qus ósirý baǵyty boıynsha óndiristik jumystar uıymdastyrǵan.
Bul jobalar sottalǵandardyń eńbek daǵdylaryn jetildirýge, kásibı tájirıbe jınaýyna jáne bostandyqqa shyqqannan keıin qoǵamǵa beıimdelýine múmkindik beredi.
Sottalǵandardy eńbekpen qamtý jáne jańa óndiristik oryndar ashý baǵytyndaǵy jumystar aldaǵy ýaqytta da jalǵasady.
Aıta keteıik, Qazaqstandaǵy túzeý mekemesinde jazasyn óteýshi 5000-nan astam kitap oqyǵan.
