Shymkenttiń túzeý mekemesinde azaptaý isi: úsh qyzmetker qamaýǵa alyndy

ASTANA.KAZINFORM — QR Adam quqyqtary jónindegi ýákil Shymkentte túzeý mekemesiniń qyzmetkerleri azaptaý isi boıynsha kúdikke ilingenin málimdedi. 

Shymkent qalasy boıynsha óńirlik ókil Nurjan Ábdezov sottalǵandardyń birin jeke qabyldady.

Onyń aıtýynsha, 2025 jylǵy maýsym aıynda mekeme qyzmetkerleri qolyna kisen salyp, ony uryp-soǵyp, temir torǵa ilip, 4 saǵat boıy asýly kúıde qaldyrǵan, sondaı-aq aıaq kıimin sheship, tabanynan shoqparmen urǵan.

Sonymen qatar qabyldaý barysynda taǵy bir sottalǵannyń soqqyǵa jyǵylyp, onyń jaq súıeginiń synǵany anyqtaldy.

— Atalǵan jaǵdaılar boıynsha óńirlik ókil tarapynan jedel túrde tıisti áreket etý sharalary qabyldandy. Nátıjesinde medıtsınalyq kómekti ýaqtyly kórsetpegeni úshin medıtsına qyzmetkerleri jaýapkershilikke tartyldy, sondaı-aq mekeme qyzmetkerlerine qatysty QK-tiń 362-baby boıynsha sotqa deıingi tergep-tekserý tirkeldi, — delingen habarlamada.

Quqyq qorǵaý ınstıtýty mekeme qyzmetkerleriniń áreketterinde azaptaý belgileriniń bolýyna baılanysty olardyń áreketterin qaıta qaraý jóninde joǵary qadaǵalaý organyna júgindi.

— Bas prokýratýra atalǵan ustanymdy qoldap, ótken jyldyń sońynda sotqa deıingi tergep-tekserý QK-tiń 146-babynyń 3-bóligine qaıta saralandy. Mekemeniń úsh qyzmetkeri qamaýǵa alyndy, — dep habarlady tıisti organnan.

Sottalǵandardy ustaý jaǵdaılarymen baılanysty azaptaýlar men qatygezdikke jol bermeý — Adam quqyqtary jónindegi ýákil men onyń ókilderi qyzmetiniń basty baǵyttarynyń biri. 

Jabyq mekemelerge barý jáne shaǵymdardy qaraý barysynda adam quqyqtarynyń yqtımal buzylý belgilerine erekshe nazar aýdarylyp, tıisti sharalar qabyldanady.

Eske sala keteıik, buǵan deıin Aqmola túrmesindegi azaptaý isi boıynsha 12 qyzmetker sotta jaýap berip jatqanyn jazǵan edik.