Shymkenttegi túngi klýb tyıym salynǵan «kúlki gazyn» satyp kelgen

ASTANA. KAZINFORM — Іshki ister mınıstrligi «Zań men tártip» qaǵıdaty aıasynda kúshti áser etetin zattardyń zańsyz aınalymyna qarsy júıeli jumysty jalǵastyryp jatyr, dep habarlaıdy Polisia.kz.

Jyl basynan beri Qazaqstanda tyıym salynǵan qosylystardy, onyń ishinde kúshti áser etetin zattardy zańsyz aınalymǵa engizýge baılanysty quqyqqa qarsy áreketter úshin qylmystyq jaýapkershilik belgilendi. Atalǵan zattardyń qatarynda túngi klýbtarda keńinen taralǵan, «kúlki gazy» dep atalatyn azot totyǵy da bar.

— Bıyl esirtki qylmysyna qarsy is-qımyl bólimsheleri birqatar óńirde azot totyǵy toltyrylǵan metall ballondardy zańsyz tasymaldaý jáne saqtaý derekterin anyqtap, jolyn kesti. Atap aıtqanda, Shymkent qalasyndaǵy túngi klýbtardyń birinde «smesharıkter» dep atalatyn kúshti áser etetin ónimdi júıeli túrde satý faktisi áshkerelendi, — delingen aqparatta.

Jedel is-sharalar barysynda 416 ballon saqtalǵan qoıma anyqtaldy. Olardyń jartysy tyıym salynǵan qosylyspen toltyrylǵan. Qazirgi ýaqytta tıisti saraptama taǵaıyndaldy.

ІІM azot totyǵyn medıtsınalyq maqsattan tys qoldaný qaýipti ekenin eskertti. Buǵan deıin bul zatty paıdalaný adam ólimine ákep soqqan jaǵdaılar tirkelgen. Kúshti áser etetin zattardyń zańsyz aınalymy úshin 15 jylǵa deıin bas bostandyǵynan aıyrý jazasy kózdelgen.

Azamattardyń qaýipsizdigin qamtamasyz etýge jáne tyıym salynǵan zattardyń zańsyz aınalymynyń jolyn kesýge baǵyttalǵan is-sharalar aldaǵy ýaqytta da jalǵasady.

Aıta keteıik, Shymkentte kıberpolıtseıler iri ınternet-alaıaqtyq shemasyn anyqtady.