Shymkenttegi toqyma kásiporny el ekonomıkasyna qosqan úlesi úshin baǵalandy
ShYMKENT. KAZINFORM — Májilis depýtattary, «AMANAT» partııasy fraktsııasynyń músheleri Danabek Isabekov pen Nursultan Baıtilesov Shymkent qalasyndaǵy «Balabi Textile» kásipornynyń óndiris barysymen tanysty.
Májilistiń baspasóz qyzmeti habarlaǵandaı, «Ońtústik» arnaıy ekonomıkalyq aımaǵynda ornalasqan kásiporyn 2024 jylǵy jeltoqsan aıynda iske qosylǵan. Jobany júzege asyrýǵa 6,5 mlrd teńgeden astam ınvestıtsııa tartylyp, nátıjesinde 260 turaqty jumys orny ashylǵan. Qýaty jylyna 50 mln jup shulyq ónimin shyǵarýǵa jetetin Kásiporyn óz ónimin ishki naryqpen qatar, alys-jaqyn shetelderge de eksporttaıdy.
Depýtat Danabek Isabekov mundaı jobalardyń qala áleýetin kóterýde mańyzdy ról atqaratynyn atap ótti.
— Zamanaýı kásiporyndardyń iske qosylýy el ekonomıkasyn ártaraptandyrýǵa, otandyq óndiristi damytýǵa jáne jańa jumys oryndaryn ashýǵa úlken úles qosady. Memleket tarapynan kásipkerlikti qoldaýǵa baǵyttalǵan tetikter bar, sol múmkindikterdi tıimdi paıdalaný arqyly óndiristi keńeıtýge bolady, — dedi ol.
Májilis depýtattary kásiporyn jumysyna oń baǵa berip, mundaı óndiris oshaqtary Shymkent qalasynyń áleýmettik-ekonomıkalyq damýyna serpin beretinin aıtty. Kezdesý barysynda kásipkerlerdi memlekettik qoldaý, eksportty ulǵaıtý jáne óndiris kólemin arttyrý máseleleri de sóz boldy.
Budan buryn depýtattar Pavlodar oblysynyń qoǵamdyq uıymdarymen eriktiler qozǵalysyn damytý joldaryn talqylaǵanyn jazǵanbyz.