Shymkenttegi sýyq saraı: Tanymal akter «Túrkistan saraıynyń» qazirgi jaǵdaıyn synǵa aldy

ShYMKENT. KAZINFORM — «Túrkistan saraıy» 2015 jyly paıdalanýǵa berilgen. Qazirgi ýaqytta ǵımaratqa kúrdeli jóndeý jumystaryn júrgizý úshin jobalyq-smetalyq qujattama ázirlengen.

«Óner qyrandary» teatrynyń jetekshisi, akter Madııar Serikbaev Shymkent qalasynda ornalasqan «Túrkistan saraıynda» kórermen men ónerpazdarǵa qolaıly jaǵdaı jasalmaı otyrǵanyn aıtty.

— Qanshama jyl boldy, Shymkentke kelgen saıyn óner ordasynda elektrli jylytý peshimen otyramyz? Sahna «pýshkamen» jylytylyp jatyr. Múlde jylý joq. «Túrkistan saraıynda» osyndaı jaǵdaı bolyp tur. Kórermen syrt kıimmen otyrýǵa májbúr, perdeler tozǵan, esikter durys jabylmaıdy, — dep renishin bildirdi akter.

Osyǵan qatysty Kazinform tilshisiniń saýalyna Shymkent qalasynyń mádenıet, tilderdi damytý jáne arhıvter basqarmasy resmı túsinik berdi.

— Bıyl qarasha aıynyń sońǵy kúnderi «Túrkistan saraıy» ǵımaratyna keletin negizgi jylý júıesinde aqaýlar anyqtaldy. Oǵan jóndeý jumystary júrgizilip, qaıta qosylýyna baılanysty ǵımarat ishin jylytý maqsatynda qosymsha jylytý qurylǵylary qoıylǵan bolatyn. Búgingi tańda jylý júıesi qalypty deńgeıde jumys istep tur, — delingen vedomstvo jaýabynda.

Áleýmettik jelidegi jurtshylyqtyń pikirine qaraǵanda, olar Mádenıet úıiniń tozyp bara jatqanyn, buǵan deıin de kontsertterde záýlim saraıdyń ishi sýyq bolǵanyn jazǵan.

Budan buryn Shymkent áýejaıyndaǵy aqyly turaq baǵasy júrgizýshiler narazylyǵyn týdyrǵanyn jazǵan edik.