Shymkenttegi sheteldik stýdentke qatysty oqıǵa: bazar kúzetshileri jazalandy

ShYMKENT. KAZINFORM – Shymkentte sheteldik stýdentke qatysty oqıǵa qoǵamdyq rezonans týdyrdy. Bazarda bolǵan janjaldan keıin jas jigittiń jeke zattary men smartfony tartyp alynǵany belgili boldy. Nátıjesinde oqıǵaǵa qatysy bar bazar kúzetshileri ákimshilik jaýapkershilikke tartyldy.

Úndistannan kelgen medıtsınalyq JOO-nyń stýdenti TikTok jelisi úshin beınerolık túsirip júrgen sátinde janjalǵa tap bolǵanyn aıtty. Onyń sózinshe, Shymkenttegi bazarlardyń birinde vıdeo túsirýge kedergi jasalyp, keıin shtatıvpen birge telefony men sómkesin julyp alyp, ony kelemejdegen.

Qaladaǵy kórikti jerler men kúndelikti ómirdi pozıtıvti qyrynan kórsetip júrgen stýdenttiń vıdeoúndeýi áleýmettik jelilerde lezde taralyp, kópshiliktiń qyzý talqysyna tústi.

Qoǵamdyq rezonanstan keıin polıtsııa oqıǵaǵa qatysy bar barlyq adamdardy anyqtap, ustady.

– Shymkent qalasyndaǵy bazarlardyń birinde sheteldik azamat pen bazar kúzetshileri arasynda janjal shyqty. Tekserý barysynda atalǵan azamattyń áleýmettik jelilerde jarııalaý maqsatynda beınetúsirilim jasap, qatty mýzyka qosqany jáne satýshylardy olardyń kelisiminsiz túsirgeni anyqtaldy. Sonyń saldarynan saýdagerlerge qolaısyzdyq týyndaǵan. Tildik kederginiń saldarynan satýshylardyń eskertýleri birden túsinikti bola qoımaǵan, – dep habarlady Shymkent qalalyq polıtsııa departamenti.

Saýdagerler túsirilimdi toqtatýdy jáne mýzykanyń daýysyn azaıtýdy suraǵannan keıin bazar kúzetine júgingen. Artynsha sózben bastalǵan daý qoǵamdyq tártiptiń buzylýyna ákeldi.

Oqıǵaǵa baılanysty quqyq buzýshylar ustalyp, polıtsııa bólimine jetkizildi. Olarǵa usaq buzaqylyq faktisi boıynsha ákimshilik is qozǵaldy. Materıaldar protsessýaldyq sheshim qabyldaý úshin sotqa joldanady.

Quqyq buzýshylarǵa 20 aılyq eseptik kórsetkish (AEK) mólsherinde aıyppul salý, bes táýlikten on bes táýlikke deıin ákimshilik qamaýǵa alý nemese 60 saǵatqa deıin qoǵamdyq jumystarǵa tartý jazasy qoldanylýy múmkin.

– Sonymen qatar oqıǵaǵa qatysýshylardyń barlyǵymen profılaktıkalyq túsindirý jumystary júrgizilip, kelisimsiz beınetúsirilim jasaýǵa jáne qoǵamdyq tártipti buzýǵa jol berilmeıtini týraly zań talaptary túsindirildi. Polıtsııa azamattardy zań talaptaryn saqtaýǵa, bir-birine qurmetpen qaraýǵa jáne daý-janjal týyndaǵan jaǵdaıda ony tek quqyqtyq jolmen sheshýge shaqyrady, – dep málimdedi quqyq qorǵaý organdary.

Buǵan deıin Almaty – Bishkek tasjolynda bolǵan ólimge ákelgen jol-kólik oqıǵasy týraly habarlanǵan bolatyn. Aldyn ala málimet boıynsha, júrgizýshi kólikti basqara almaı, Toyota Alphard avtokóligi aýdarylǵan. Apat saldarynan Úndistannyń úsh azamaty – Shymkenttegi Ońtústik Qazaqstan medıtsına akademııasynyń stýdentteri qaza tapty.