Shymkenttegi saıabaqta attraktsıonnyń trosy úzilip, qyz balanyń qoly syndy

Oqıǵa 8 tamyz kúni Báıdibek bı dańǵylyndaǵy «Jaılaýkól» saıabaǵynda bolǵan. Otbasy balalarymen birge saıabaqqa shamamen saǵat 19:00-de barǵan. Eki saǵattaı ýaqyt ótken soń qyz djampıng-attraktsıonyna otyrǵan.

Qyzdyń anasynyń aıtýynsha, sekirý kezinde trostardyń biri úzilip, saldarynan bala qulap, qolyn syndyrǵan. 

– Biz balalarymyzben birge serýendeý úshin saıabaqqa kelgen edik. Saǵat toǵyz shamasynda qyzym djampıng-attraktsıonyna otyrdy. Sekirý kezinde tros úzilip, ol qulap, qolyn syndyryp aldy. Shymkent ákimdiginen saıabaq ákimshiligin jáne attraktsıondardyń tehnıkalyq jaǵdaıyn tekserýdi suraımyn. Munda kún saıyn kóptegen bala keledi. Bul – bala qaýipsizdigine tikeleı qatysty másele, – dedi qyzdyń anasy.

Qyzdyń anasy oqıǵadan keıin saıabaq ákimshiligi otbasydan keshirim suramaǵanyn da jetkizdi.

Alaıda «Jaılaýkól» ákimshiligi bul pikirmen kelispedi. Saıabaq ókilderiniń aıtýynsha, qyzmetkerler oqıǵaǵa birden áreket etip, jedel járdem shaqyrǵan jáne zardap shekken qyzdy aýrýhanaǵa jetkizýge kómektesken.

– Oqıǵa bolǵan sátten bastap biz qyzdyń ata-anasymen jáne jaqyndarymen baılanysta boldyq, onyń jaǵdaıyna alańdaıtynymyzdy bildirip, keshirim suradyq. Sondyqtan áleýmettik jelilerde taraǵan «ákimshilik tipti keshirim de suramady» degen aqparat shyndyqqa janaspaıdy. Biz bul jaǵdaıdy nazardan tys qaldyrǵan joqpyz jáne adamdardyń densaýlyǵyna qatysty máselelerge nemquraıly qaramaımyz, – dep málimdedi saıabaq ákimshiligi.

Sonymen qatar «Jaılaýkól» ákimshiligi djampıng-attraktsıonynyń óz qaramaǵynda emes ekenin atap ótti. Attraktsıon saıabaq aýmaǵynda qyzmet kórsetetin jalǵa alýshyǵa tıesili.

Ákimshilik bolǵan jaǵdaıǵa qatysty jaýapkershilikten jaltarmaıtynyn jáne oqıǵanyń barlyq mán-jaıyn anyqtaýǵa múddeli ekenin málimdedi.

– Biz daýlasýǵa, kináni bir-birimizge artýǵa nemese bolǵan jaǵdaıdy jasyrýǵa nıetti emespiz. Barlyq mán-jaı zańda belgilengen tártippen anyqtalǵanyn qalaımyz. Qazir biz úshin eń mańyzdysy – zardap shekken qyzdyń densaýlyǵy. Oǵan tezirek saýyǵyp ketýin tileımiz, – delingen ákimshilik habarlamasynda.

Shymkent qalasy polıtsııa departamentiniń habarlaýynsha, atalǵan fakti boıynsha qylmystyq is qozǵaldy.

– Qaladaǵy attraktsıondardyń birinde kámeletke tolmaǵan balanyń jaraqattanýyna sebep bolǵan, qaýipsizdik talaptaryna saı kelmeıtin qyzmet kórsetý deregi boıynsha tergeý amaldary júrgizilip jatyr. Onyń nátıjesi boıynsha tıisti protsestik sheshim qabyldanady, – dep málimdedi polıtsııa departamentinen.

Buǵan deıin Qyzylordadaǵy saıabaqtardyń birinde jas jigittiń aıaǵy attraktsıonǵa qysylyp qalyp, aýyr jaraqattanǵany habarlanǵan. Osy oqıǵa boıynsha da polıtsııa qylmystyq is qozǵaǵan.