Shymkenttegi Prezıdent rezıdentsııasy daryndy balalarǵa arnalǵan ortalyqqa aınalady

ShYMKENT. KAZINFORM – Prezıdent rezıdentsııasy jańa oqý jylynan bastap daryndy balalarǵa arnalǵan lager retinde jumysyn bastaıdy. Bul týraly qala ákimi Ǵabıt Syzdyqbekov tamyz pedagogıkalyq keńesinde aıtty.

Qala ákiminiń aıtýynsha, bul bastama – Memleket basshysynyń jastarǵa degen qamqorlyǵyn iske asyra otyryp, elimizdiń keleshek kóshbasshylaryn tárbıeleýge baǵyttalǵan mańyzdy qadam bolmaq.

Lager jyl boıy turaqty qyzmet etedi. Ár aýysymda 50-60 bala qamtylyp, jylyna 2 500-ge jýyq jas daryn erekshe baǵdarlamamen tárbıelenedi.

Zamanaýı jabdyqtar qoıylyp, qaýipsizdik talaptary tolyq qamtamasyz etiledi jáne barlyq qajetti jaǵdaı jasalady. Sonymen qatar munda jatyn bólmeleri, oqý jáne mádenı zaldary, sport alańdary, ekologııalyq taza aýla, kitaphana men medpýnkt qarastyrylǵan.

Lagerde olımpıada jeńimpazdary, úzdik oqýshylar, ónertapqyshtar men ǵylymǵa qushtar jáne mádenıet pen ónerde erekshe jetistikteri bar balalar bas qosyp, sheberlikterin ushtaýǵa múmkindik alady.

Aıta keteıik, budan buryn Memleket basshysy Shymkent ákimine qalanyń damýyna qatysty naqty mindetter júktegenin jazǵan bolatynbyz.