Shymkenttegi ózender men kanaldar lastanyp jatyr

ShYMKENT. KAZINFORM - Monıtorıng nátıjeleri ekologııalyq ahýaldyń ýshyǵyp turǵanyn kórsetti.

Shymkent qalasy boıynsha ekologııa departamenti basshysynyń mindetin atqarýshy Sabyr Balybektiń sózine súıensek, Shymkent qalasy aýmaǵynan ótetin Qoshqar ata, Qarasý, Badam, Saıramsý ózenderi men Qosdıirmen, Toǵys, Tekesý, BMK kanaldaryna júrgizilgen bir rettik monıtorıngtik zertteýler olardyń ekologııalyq jaǵdaıynyń kúrdeli ekenin kórsetken. Taldaý nátıjesi boıynsha, barlyq sý kózderiniń sońǵy núktelerinde quramyndaǵy lastaýshy zattardyń kontsentratsııasy artqany baıqalǵan. Bul ózen sýlarynyń lastanyp jatqanyn kórsetedi.

Ásirese, Qoshqar ata ózenindegi jaǵdaı alańdatarlyq. Munda lastanýdyń negizgi sebebi – ózen mańyndaǵy turǵyn úılerdiń káriz júıesine qosylmaýy. Sonymen qatar, ózen sýlarynyń qala aýmaǵyndaǵy tyǵyz ornalasqan aýdandardan ótýi men sýarý júıelerinen tastalatyn tógindiler de sapasyna tikeleı keri áser etip otyr.

Ekologııa departamenti men «Qazaqstan Ǵarysh Sapary» ulttyq kompanııasy 8–14 shilde aralyǵynda júrgizgen ǵaryshtyq túsirilimder nátıjesinde qalanyń ár aýmaǵynan 46 ruqsatsyz qoqys úıindisin anyqtaǵan. Olardyń 26-sy Qarataý aýdanyna, 6-Turan, 6- Eńbekshi, 5-Abaı, 3-Ál-Farabı aýdanyna tıeseli.

- Anyqtalǵan derekter boıynsha tıisti aýdan ákimdikterine resmı hattar joldanyp, keıbir qoqys oryndarynyń tazartylǵany rastaldy. Alaıda qalǵan jerlerge qatysty zerdeleý jumystary jalǵasýda. Budan bólek, Ekologııa departamenti men qalalyq jáne aýdandyq prokýratýra birlesip taǵy da 35 zańsyz qoqys ornynyń baryn anyqtady. Atalǵan derekter boıynsha, departamenttiń qorytyndysy negizinde prokýratýranyń tarapynan Abaı, Qarataý, Eńbekshi aýdany ákimdiginiń laýazymdy tulǵalaryna QR Ákimshilik quqyq buzýshylyq týraly kodeksiniń 324-baby 1 tarmaǵymen jaýapkershilik qaraldy, - dedi Sabyr Balybek.

Aıta keteıik, budan buryn Shymkentte ákimdiktiń 54 qyzmetkeri qumar oıynǵa boı aldyrǵan.