Shymkenttegi oqýshylar tóbelesi: qyzǵanyshtan týǵan janjal qylmystyq iske ulasty
ShYMKENT. KAZINFORM — Shymkent qalasyndaǵy saýda-oıyn-saýyq ortalyqtarynyń biriniń mańynda bolǵan jasóspirimder arasyndaǵy tóbeleste qarý qoldanylǵan bolýy múmkin degen qaýeset qylmystyq is qozǵaýǵa sebep boldy. Qaqtyǵysqa qatysqan barlyq tulǵalar ustaldy, polıtsııa oqıǵanyń mán-jaıyn tekserip jatyr, dep habarlaıdy Kazinform agenttiginiń tilshisi.
Áleýmettik jelilerde 21 qarasha kúni Mega Planet SOO mańynda tórt jasóspirim óz qurdastarymen janjaldasyp, sońy tóbeleske ulasqany jóninde aqparat tarady. Sondaı-aq qatysýshylardyń biri tapansha shyǵaryp, oq atty degen boljam aıtylǵan. Abyroı bolǵanda tóbelestiń sońy aýyr saldarǵa aparǵan joq. Alaıda qala ortalyǵynda mundaı oqıǵanyń bolýy qoǵamda alańdaýshylyq týǵyzdy.
Polıtsııa departamentine qaqtyǵysqa qatysqan kámeletke tolmaǵandardyń ákesinen aryz tústi. Vedomstvo oqıǵaǵa resmı túsinikteme berip, aqparat taratýda jaýapkershilik tanytý qajettigin atap ótti.
— Qala turǵynynyń kámeletke tolmaǵan uldaryna dene jaraqaty keltirilgeni jónindegi aryzy boıynsha qylmystyq is qozǵaldy. Janjalǵa qatysqan barlyq tulǵalar zańdy ókilderimen birge jedel túrde ustalyp, polıtsııa bólimine jetkizildi, — dep habarlady Shymkent qalalyq PD.
Aldyn ala anyqtalǵandaı, jasóspirimder burynnan bir-birin tanyǵan jáne olardyń arasynda qyzǵanysh negizinde jeke janjal týyndaǵan.
Polıtsııa tergeý jumystaryn jalǵastyryp, beınebaqylaý kameralarynyń jazbalary zerdelenip, qatysýshylar men kýágerlerden jaýap alynyp jatyr.
— Aldyn ala tergeý-jedel sharalarynyń, sonyń ishinde kýágerlerdiń kórsetýleriniń nátıjesine sáıkes, atys qarýyn nemese ózge de qarýdy qoldaný faktisi ázirge rastalmaı otyr, alaıda bul jaıt qosymsha tekserilip jatyr, — dep qosty vedomstvo ókilderi.
Qaqtyǵysqa qatysqan jasóspirimder profılaktıkalyq esepke alyndy. Olardyń ata-analary kámeletke tolmaǵandardy tárbıeleý jónindegi mindetterin tıisinshe oryndamaǵany úshin jaýapkershilikke tartylmaq.
— Materıaldar kámeletke tolmaǵandar isi jónindegi komıssııanyń qaraýyna jiberiledi, onda tıisti quqyqtyq baǵa beriledi. Polıtsııa tekserilmegen, ádeıi jalǵan aqparat taratqany úshin qylmystyq jaýapkershilikke deıin jaza qarastyrylǵanyn qatań eskertedi, — dep málimdedi quqyq qorǵaý organdary.
Eske sala keteıik, buǵan deıin Túrkistan oblysynda adam ólimimen aıaqtalǵan qaıǵyly oqıǵa bolǵan. Aldyn ala málimetter boıynsha, toǵyzynshy synyp oqýshysy synyptasyn keýde tusynan uryp, saldarynan 15 jastaǵy jasóspirim oqıǵa ornynda kóz jumǵan.
Sondaı-aq Jańaózen qalasynda oqýshynyń qatygezdikpen soqqyǵa jyǵylǵany týraly habarlanǵan. Synyptastary túlekti sheteldik joǵary oqý ornyna grant jeńip alǵany úshin urǵan bolýy múmkin degen boljam aıtylǵan.