Shymkenttegi oblystyq fılarmonııa Túrkistanǵa qashan kóshiriledi

TÚRKІSTAN. KAZINFORM – 2018 jyly jańa oblys qurylǵannan keıin Shymkent qalasynda ornalasqan birqatar mádenı nysandar Túrkistanǵa kóshirildi.

Oblystyq mádenıet basqarmasy basshysynyń mindetin atqarýshy Ádil Qonysbekovtyń aıtýynsha, qazirgi tańda oblys ortalyǵyndaǵy 6 mádenı mekemeniń 3-eýi óz ǵımaratynda, qalǵan 3-eýi jalǵa alynǵan nysandarda ornalasqan. 

Al ǵımarat máselesi tolyq sheshilmegendikten, 2 mýzeı men 1 kontserttik mekeme ázirge Shymkent qalasynda qyzmetin jalǵastyryp jatyr.

– Qalǵan mekemelerdiń máselesin oblystyq bıýdjettiń múmkindigin eskere otyryp, sondaı-aq Úkimet qaýlysyna sáıkes, 2028 jylǵy 31 jeltoqsanǵa deıin «Mádenıet týraly» QR Zańynda aıqyndalǵan mádenıet uıymdarynyń jańa obektileri men qurylys jaılaryn salýǵa bıýdjet qarajatyn bólýge moratorıı jarııalanǵanyn nazarǵa alyp, kezeń-kezeńimen sheshý josparlanyp otyr, - dedi ol.

Ǵımaraty Shymkentte ornalasqan mádenı nysandardyń biri – oblystyq fılarmonııa. Qazirgi tańda atalǵan ujymda 250-ge jýyq adam eńbek etedi.

Oblystyq qurylys basqarmasynyń málimetinshe, Túrkistan qalasynda oblystyq fılarmonııanyń jańa ǵımaratyn salý josparlanǵan. Jalpy 500 oryndyq mádenı nysan 3,79 gektar aýmaqta boı kóteredi.

– Jobada fılarmonııa ǵımaraty dástúrli shyǵys arhıtektýrasynyń elementterin zamanaýı sáýlettik sheshimdermen úılestire otyryp, erekshe kelbetke ıe bolady, - delingen vedomstvo málimetinde.

Qazirgi ýaqytta oblystyq fılarmonııa qurylysyna qajetti jer telimin jańa qala aýmaǵyndaǵy ákimshilik-iskerlik ortalyqtan qarastyrý jumystary júrip jatyr.

Budan buryn Túrkistan qalasynyń eski shahar aýmaǵy men temirjol vokzaly mańyndaǵy birneshe tarıhı ǵımarat tozyp, paıdalanýsyz qalǵanyn jazǵan edik.