Shymkenttegi medıtsına uıymdarynda polıtsııa beketteri jumys isteı bastady

ShYMKENT. KAZINFORM — Bul shara sońǵy ýaqytta medıtsına qyzmetkerlerine jasalǵan shabýyl oqıǵalarynyń jıileýine baılanysty qolǵa alynyp otyr. 

Shymkent qalasy densaýlyq saqtaý basqarmasy men polıtsııa departamentiniń uıymdastyrýymen alty medıtsınalyq mekemede polıtsııa beketi ashyldy. Olardyń qatarynda № 1 klınıkalyq aýrýhana, № 2 jáne № 3 qalalyq aýrýhanalar, perınataldyq ortalyq, qalalyq perzenthana jáne balalar aýrýhanasy bar.

— Polıtsııa beketterin qurý oqıǵalarǵa jedel áreket etýge, shıelenisti jaǵdaılardyń aldyn alýǵa, sondaı-aq medıtsına qyzmetkerleri men patsıentterdiń qaýipsizdigin qamtamasyz etýge múmkindik beredi. Bul — Memleket basshysynyń medıtsına qyzmetkerlerine qatysty zorlyq-zombylyqqa jazany qatańdatý jónindegi tapsyrmasyna sáıkes atqarylyp otyrǵan naqty qadam, — delingen qalalyq densaýlyq saqtaý basqarmasy taratqan aqparatta.

Sonymen qatar, Shymkent qalalyq densaýlyq saqtaý basqarmasy «Qalalyq juqpaly aýrýlar aýrýhanasy», «T. Orynbaev atyndaǵy gıperbarııalyq oksıgenatsııa ortalyǵy» jáne «Hadısha» emhanasynda táýliktik kezekshilik uıymdastyryp, medıtsınalyq mekemelerdegi tártipti saqtaý maqsatynda Shymkent qalasy polıtsııa departamentine baqylaýǵa alý týraly hat joldanǵanyn málimdedi.

Aıta keteıik, budan buryn Shymkentte er adam naýqasty soqqyǵa jyǵyp, aýrýhanada polıtsııaǵa qarsylyq bildirgenin jazǵan bolatynbyz.