Shymkenttegi M.Áýezov atyndaǵy ýnıversıtettiń burynǵy basshylaryna úkim shyqty
ShYMKENT. KAZINFORM — Shymkent qalasynyń qylmystyq ister jónindegi aýdanaralyq sotynda M.Áýezov atyndaǵy Ońtústik Qazaqstan ýnıversıtetiniń burynǵy birinshi prorektory, sharýashylyq basqarmasy jáne qarjy departamentteriniń basshylary, sondaı-aq birneshe kásipkerge qatysty qylmystyq is qaralyp, úkim jarııalandy. Bul týraly qalalyq sottyń baspasóz qyzmeti habarlady.
Іs materıaldaryna sáıkes, 2022 jylǵy shilde men qarasha aılary aralyǵynda ýnıversıtettiń birinshi prorektory memlekettik satyp alý sharttaryna zańda belgilengen tártippen konkýrs ótkizbesten jáne nátıjelerin teksermesten qol qoıǵan. Ol qarjy departamentiniń basshysyna jalpy somasy 140 886 000 teńge bolatyn qarajatty úsh jeke kásipkerdiń esepshotyna aýdarýdy tapsyrǵan. Onyń ishinde 13 185 000 teńge keıinnen ıemdenilip, jymqyrylǵan.
Sondaı-aq, sharýashylyq basqarmasy departamentiniń basshysy, qarjy departamentiniń basshysy jáne eki kásipker aldyn ala sóz baılasyp, asa iri kólemdegi senip tapsyrylǵan múlikti ıemdengeni anyqtaldy.
2024 jylǵy sáýir men qyrkúıek aılary aralyǵynda rektordyń mindetin atqarýshy memlekettik satyp alýlardy portalǵa jarııalamastan, jalpy somasy 116 000 000 teńgeni quraıtyn sharttarǵa qol qoıǵan. Bul qarjyǵa ýnıversıtettiń bas ǵımaratynyń tehnıkalyq besinshi qabatyna jóndeý jumystary júrgizilgenimen, zańdy ruqsattar alynbaǵan.
Tekserý nátıjesinde ýnıversıtetke jalpy somasy 116 000 000 teńge kóleminde materıaldyq zalal kelgen. Al kásipkerlerdiń biri jymqyrylǵan qarjynyń bir bóligin avtokólik satyp alýǵa jumsaǵan. Aqsha qarajatyn zańdastyrǵan. Qylmystyq is boıynsha keltirilgen zalal ótelgen.
Sot qylmystyq jaýapkershilikti jeńildetetin mán-jaılar retinde aıyptalýshylardyń shynaıy ókinish bildirýin, asyraýyndaǵy jasóspirim balalardyń bolýyn jáne keltirilgen zalaldyń ótelýin eskerdi.
Sot úkimimen:
• burynǵy birinshi prorektor — memlekettik organdardaǵy laýazymdy qyzmetterdi ómir boıyna atqarý quqyǵynan aıyryla otyryp, 5 jylǵa bas bostandyǵynan aıyryldy;
• sharýashylyq basqarmasy departamentiniń basshysy — 5 jyl 7 aı 6 kúnge shartty túrde bas bostandyǵynan aıyryldy;
• qarjy departamentiniń basshysy — 5 jyl 7 aı 6 kúnge bas bostandyǵynan aıyryldy;
• kásipkerlerdiń biri — 5 jyl 7 aı 6 kúnge shartty túrde bas bostandyǵynan aıyryldy;
• taǵy bir kásipker — múlki tárkilenip, 5 jyl 7 aı 6 kúnge bas bostandyǵynan aıyryldy;
• bir qyzmetker — 1 jylǵa bostandyǵyn shekteý jazasyna kesildi.
Sot úkimi zańdy kúshine engen joq.
Aıta keteıik, budan buryn Shymkentte sáýlet basqarmasynyń basshysy Arman Ábdeshov ustalǵanyn jazǵan bolatynbyz.