Shymkenttegi lombardqa qarýly shabýyl jasaǵan adamǵa sot úkimi shyqty
ASTANA. KAZINFORM - Shymkentte medıtsınalyq betperde kıgen qylmysker lombardqa basyp kirip, ondaǵy qyzmetkerdi oıynshyq myltyqpen qorqytyp, 100 myń teńge talap etken, dep habarlaıdy QR Joǵarǵy sotynyń baspasóz qyzmeti.
Baspasóz qyzmetiniń habarlaýynsha, qylmyskerdiń jolyn lombardqa telefonyn alý úshin kirgen 18 jastaǵy jigit kesken.
Qylmysker oqıǵa ornynda ustalyp, qylmysyn aıaǵyna deıin jetkize almaǵan.
Jigitke sertıfıkat berildi, qylmysker ustaldy.
Shymkent qalasynyń qylmystyq ister jónindegi aýdanaralyq sotynda aıyptalýshyǵa qatysty QK-niń 24-babynyń 3-bóligi – 191-babynyń 2-bóliginiń 1-tarmaǵymen (zorlyq-zombylyq qoldanamyn dep qorqytyp, bótenniń múlkin ashyq urlaýǵa oqtalý) qylmystyq is qaraldy.
Sot talqylaýy barysynda prokýror aıypty QK-niń 24-babynyń 3-bóligi – 191-babynyń 1-bóligimen ózgertip, «zorlyq-zombylyq jasaımyn dep qorqytýmen» degen biliktilik belgini alyp tastady.
Jábirlenýshi taraptyń qarsylyǵy bolmaǵan jaǵdaıda aıypty mundaı ózgertý sot úshin mindetti bolyp tabylady.
Sottalýshynyń kinási jábirlenýshi men jábirlenýshiniń ókiliniń aıǵaqtarymen, beınejazbalarmen jáne basqa da dáleldemelermen dáleldendi.
Joǵaryda aıtylǵandardyń negizinde sot sottalýshyny kináli dep tanydy.
QK-niń 24-babynyń 3-bóliginde, 191-babynyń 1-bóliginde kózdelgen qylmys aýyrlyǵy ortasha qylmystarǵa jatady.
Jeńildetetin mán-jaılarǵa kinásin moıyndaý, jasaǵan qylmysyna shyn júrekten ókiný, jastyǵy, sottylyǵynyń bolmaýy jatqyzyldy, jaýaptylyqty aýyrlatatyn mán-jaılar belgilenbegen.
Zańǵa sáıkes, qylmysqa oqtalý úshin jaza eń joǵary merzimniń ¾ bóliginen aspaýy kerek.
«Іs boıynsha tergeý jedeldetilgen tártipte júrgizildi, sondyqtan QK-niń 56-babynyń 3-bóligine sáıkes jaza eń joǵary merzimniń ½ bóliginen aspaýy kerek. Osyǵan baılanysty sottalýshy 1 jyl 6 aı merzimge bas bostandyǵyn shekteýge jatady. Úkim zańdy kúshine engen joq»,-delingen habarlamada.
Osyǵan deıin Atyraý oblysynda 18 kúdiktiniń biri urlaǵan velosıpedter lombardtardan tabylǵany týraly jazdyq.