Shymkenttegi Qoshqar ata ózenine belgisiz qyzyl suıyqtyq tógildi

ShYMKENT. KAZINFORM – Saraptama qorytyndysy boıynsha tártip saqshylary kinálilerdi anyqtap, jaýapqa tartpaq.

Qoshqar ata ózenine belgisiz qyp-qyzyl suıyqtyqtyń aǵyp kelip jatqanyn qala turǵyny vıdeoǵa túsirip alǵan. Avtordyń aıtýynsha bireý mal soıyp, qanyn bulaq sýyna aǵyzyp jibergen bolýy da múmkin. Qazirgi tańda ekologtar sýdan synama alyp, sapasyn tekserip jatyr.

«Qan ba, boıaý ma áli naqtylanǵan joq. Zerdeleý jumystary júrgizilip jatyr. Kez kelgen ózenderge túsetin jańbyr, qar sýlaryna tazalaý qondyrǵylaryn qoıý kerek. Ákimshiliktiń alǵan óz mindettemesi bar», - dedi BAQ ókilderine suhbat bergen qalalyq ekologııa departamentiniń basshysy Ermahan Qozybaev.

Al, Shymkent qalalyq polıtsııa departamentiniń baspasóz qyzmeti turǵyndar tarapynan áli eshqandaı shaǵym túspegenin aıtyp ótti. Sondaı-aq zerthanalyq tekserýdiń nátıjesi boıynsha kináliler jaýapqa tartylatynyn jetkizdi.