Shymkenttegi kópqabatty úıde bolǵan órtten 50-den astam adam evakýatsııalandy

Qonaev dańǵylyndaǵy 17 qabatty turǵyn úıde órt shyqty. 10-shy qabattaǵy páterlerdiń birinde as úı, odan keıin lodjııa órtendi, dep habarlaıdy Kazinform Shymkent qalalyq TJD baspasóz qyzmetine silteme jasap.

- Saǵat 14.10-da Qonaev dańǵyly, 91 mekenjaıyndaǵy turǵyn úıde órt shyqqany týraly habarlama tústi. Turǵyn úıdiń 10-shy qabatynda 17 sharshy metr aýmaqta as úı men lodjııa órtendi, - dep habarlady tótenshe jaǵdaılar qyzmetiniń baspasóz qyzmeti. 

Oqıǵa ornyna jetken órt sóndirýshiler eki adamdy evakýatsııalady. Taǵy 50 adam, kórshi páterlerdiń turǵyndary órt týraly habardar bolǵan soń, óz betimen úılerin bosatqan.

Órt sóndirýshiler jarty saǵat boıy órtpen kúresip, 14:48-de tolyǵymen sóndirdi. Qurbandar men zardap shekkender joq. Órttiń shyǵý sebebi anyqtalyp jatyr.