Shymkenttegi kópqabatty úı turǵyndary ruqsatsyz bazardy jabýdy talap etip otyr
ShYMKENT. KAZINFORM — Terezeleriniń túbinde júrip jatqan saýda-sattyq birneshe jyldan beri turǵyndarǵa maza bermeı keledi.
Satýshylar «krytyı rynoktyń» mańyndaǵy jaıaý júrginshiler jolyn únemi basyp alyp, kıilgen kıim-keshek, kóne ydys-aıaq, turmystyq zattar jáne basqa da buıymdardy saýdalap keledi.
Jergilikti turǵyndardyń aıtýynsha, sońǵy úsh jylda jaǵdaı tipti ýshyǵyp ketken. Kóptegen ótinishke, aıyppulǵa jáne saýdany toqtatýǵa tyrysqan áreketterge qaramastan, beıbereket bazar áli de jumysyn jalǵastyryp jatyr.
— Munda antısanıtarııa jaılaǵan. Tereze asha almaımyz, bazardan taraqandar kirip ketedi, sasyq ıis múńkip turady, qoqys tolyp ketken. Qarsy ýáj aıtsaq, bizge balaǵat aıtyp, ursady. Demalys kúnderi bul jermen júrý múmkin emes. Shý, urys-keris, aıǵaı-súren tolastamaıdy. Tynysh demalýǵa da jaǵdaı joq, — dep shaǵymdandy turǵyndar.
Al satýshylardyń aıtýynsha, bul olardyń jalǵyz tabys kózi. Keıbireýler úshin zeınetaqyǵa qosymsha qarajat. Olar arnaıy belgilengen oryn berilse, jaıly jaǵdaıda saýda jasaýǵa qarsy emes.
Jergilikti ákimdik ókilderi bul aýmaqta negizinen Túrkistan oblysynan kelgen 50-ge jýyq adamnyń saýdamen aınalysyp júrgenin jetkizdi. Olarǵa «Krytyı rynok» ishinen aıyna 2000 teńgege oryn usynylǵan. Alaıda kópshiligi buǵan kelispegen.
— Biz aýlanyń kireberisin jaýyp, garajdardyń aınalasyn qorshaýmen shektedik. Satýshylarǵa ishke kóshý usynyldy, biraq kóbi eń tómengi jaldaý aqysyn da tóleýden bas tartyp otyr. Aldaǵy ýaqytta bul aýmaqty abattandyryp, tas tóselip, kógaldandyrý men gúlzar otyrǵyzý josparlanyp otyr. Eń bastysy — jaqyn mańdaǵy úı turǵyndarynyń máselesin sheshý, — deıdi Turan aýdany ákimdiginiń kásipkerlikti qoldaý bóliminiń basshysy Ermuhammed Musabek.
Alaıda qazirgi tańda turǵyndar ruqsatsyz bazarmen kórshi turýǵa májbúr. Barlyq tarapqa tıimdi balama sheshim ázirge tabylǵan joq.
Buǵan deıin Shymkent kóshelerindegi ashyq qudyqtar turǵyndardy alańdatyp otyrǵanyn jazdyq.