Shymkenttegi Kongress-holl endi «Qyzǵaldaq» dep atalady

ShYMKENT. KAZINFORM — Buǵan deıin «Tulip Hall» atalyp kelgen nysan endi qazaqy bolmysqa saı — «Qyzǵaldaq» ataýyn ıelendi.

Memleket basshysy Qasym-Jomart Toqaev Shymkent qalasyna jasaǵan jumys sapary barysynda jańa Kongress-holdyń qyzmetimen tanysyp, atalǵan nysanǵa oń baǵasyn bergen bolatyn. Sondaı-aq, bul ǵımarattyń rýhanııat pen mádenıettiń ortalyǵyna aınalýy tıis ekenin atap ótken edi.

Sonymen qatar, Prezıdent ataýǵa erekshe mán berý qajettigin aıtyp, shetelshe ataýdyń ornyna ulttyq naqyshtaǵy «Qyzǵaldaq» ataýyn usynǵan bolatyn.

— Qasym-Jomart Kemelulynyń bul bastamasy — ult rýhanııatyn jańǵyrtyp, tól mádenıetimizdi zamanaýı keńistikpen ushtastyrýdyń aıqyn kórinisi. Bul ózgeris tek ataýdyń jańarýy emes, sonymen qatar ulttyq sana men mádenıettiń jańa deńgeıge kóterilýiniń belgisi, — delingen Shymkent qalasynyń Óńirlik kommýnıkatsııalar qyzmeti taratqan habarlamada.

Aıta keteıik, «Qyzǵaldaq» Kongress-holly 2024 jyly paıdalanýǵa berilgen. Zaman talabyna saı jabdyqtalǵan nysan 2 myńnan astam kórermenge arnalǵan.

Budan buryn jazǵy shomylý maýsymynda Shymkentte qaı jerde sýǵa túsýge ruqsat berilgendigin jazǵan bolatynbyz.