Shymkenttegi «kóktem» bazary kóshiriledi

ShYMKENT. KAZINFORM — Jańa saýda ortalyǵyna barǵan kásipkerler 1 mamyrǵa deıin jaldaý aqysyn tólemeıdi.

Shymkenttegi «kóktem» bazarynyń kásipkerleri óz qyzmetin jańa orynda jalǵastyra alady. Olar bazar janynda ornalasqan jańa úsh qabatty saýda ortalyǵyna kóshedi. Barlyq kásipker úshin 2025 jyldyń 1 mamyryna deıin jaldaý aqysy alynbaıdy, bul olardyń bıznesin esh kedergisiz júrgizýge múmkindik beredi.

— Alǵashqy 3 aı jaldaý aqysy — tegin. Keıinnen jaldaý quny olardyń «Kóktem» bazarynda tólep júrgen deńgeıinde saqtalady. Mysaly, eger kásipker buryn 2×3 metr býtıkti jalǵa alý úshin 25 myń teńge tólegen bolsa, jańa saýda ortalyǵynda da osyndaı somany tóleıdi. Kásipkerlermen túsindirý jumystary júrgizildi. Qosymsha suraqtar boıynsha 87424725233 nómirine habarlasýǵa bolady, — delingen Shymkent qalasy ákimdiginiń baspasóz qyzmeti taratqan aqparatta.

Jańa saýda ortalyǵy — zamanaýı úsh qabatty ǵımarat, jalpy aýmaǵy 7200 sharshy metrdi quraıdy. Munda kásipkerlerge jańa saýda oryndary usynylady.

Saýda ortalyǵy kelesideı bólinedi:

1-qabat — santehnıka jáne qurylys materıaldary,
2-qabat — kúndelikti tutyný taýarlary (kókónis, jemis-jıdek, et ónimderi),
3-qabat — kıim-keshek, oıynshyqtar jáne basqa taýarlar.

Aıta keteıik, budan buryn Shymkenttegi dendrosaıabaqqa kirý ýaqyty men baǵasy ózgergenin jazǵan bolatynbyz.