Shymkenttegi Qaınarbulaq saıajaıyna gaz qashan jetedi
Shymkent qalasynyń ákimi Ǵabıt Syzdyqbekov ortalyq kommýnıkatsııalar qyzmetinde ótken brıfıngide Qaınarbulaq saıajaıyna gaz qashan tartylatynyn aıtty, dep habarlaıdy Kazinform.
«Shymkenttegi Qaınarbulaq saıajaıynyń halqy tabıǵı gazdy kútip júrgenine birneshe jyl boldy. Alaıda qurylysy 2022 jyly bastalǵan jobanyń bıyl da bitpeı qala ma dep turǵyndar alańdaýly. Tabıǵı gaz qashan beriledi?» dep surady jýrnalıst.
Ákimniń aıtýynsha, atalmysh saıajaı turǵyndary kógildir otyn ıgiligine kelesi jyldyń kúzine qaraı qol jetkizýi múmkin.
«Bul máseleni bilem. Jýyqta Qaınarbulaq eldi mekenine bardym. Ol jerde bir jaǵynda — Qaınarbulaq eldi mekeni, ekinshi jaǵynda — Qaınarbulaq saıajaıy ornalasqan. Bir jaǵyndaǵy 600-ge jýyq úıge gaz tartý jumysy 2022 jyldyń sońynda bastalǵan. Bıyl belgili bir sebepterge baılanysty ol jumys aıaqtalmaı otyr. Jalpy bizdiń jospar boıynsha 2024 jyldyń tamyz aıynda tolyq iske qosamyz dep otyrmyz», — dedi ákim.
