Shymkenttegi kásiporynda shetel azamatyn zańsyz ustap otyr degen aqparatqa polıtsııa túsinikteme berdi
ShYMKENT. KAZINFORM – Shymkenttegi «Sin Yuan Steel» JShS qyzmetine qatysty áleýmettik jelide taralǵan aqparatqa baılanysty polıtsııa resmı túsinikteme berdi.
Shymkent qalasy polıtsııa departamentiniń málimetinshe, tekserýge kásiporyn aýmaǵynda shetel azamaty zańsyz ustalyp otyr degen habarlama negiz bolǵan. Alaıda júrgizilgen tekserý nátıjesinde bul aqparat rastalmady.
Sonymen qatar tekserý barysynda Qazaqstanda zańdy túrde bolýyn rastaıtyn qujattary joq shetel azamattarynyń kásiporyn aýmaǵynda júrgeni anyqtalǵan.
– Sotta jınaqtalǵan qujattardy qaraý nátıjesinde 42 shetel azamaty kóshi-qon zańnamasyn buzǵany úshin ákimshilik jaýapkershilikke tartyldy. Odan bólek shetel azamattarynyń tıisti ruqsatsyz, onyń ishinde eńbek vızalarynsyz jumysqa tartylǵany belgili boldy, – dedi Shymkent qalasy PD aqparattyq saıasat basqarmasy bastyǵynyń mindetin atqarýshy Baǵlan Myrzabaev.
Qazirgi ýaqytta kásiporynnyń sheteldik jumys kúshin zańsyz tartýǵa jol bergen laýazymdy tulǵalaryn ákimshilik jaýapkershilikke tartý máselesi qarastyrylyp jatyr.
Buǵan deıin Shymkentte jolaıryq qurylysynda 54 jastaǵy jumysshy qaza tapqany týraly habarlaǵan edik.
