Shymkenttegi «Fosforshylar» saraıy memleket menshigine ótti

ASTANA. KAZINFORM – Shymkent qalasyndaǵy «Fosforshylar» saraıy memleket menshigine ótti. Kóptegen jyldan beri bos turǵan mádenıet úıine bıyl kúzde jóndeý jumystary júrgizilmek. Bul týraly Shymkent qalalyq ákimdiginiń Kazinform aqparat agenttigi joldaǵan resmı saýalyna jaýabynda aıtylǵan.

«2023 jyldyń 13 qarashasynda ótken «Darhan Grýpp» JShS qatysýshylarynyń jalpy jınalysynyń nátıjesinde «Fosforshylar» saraıy ǵımaratyn shyǵaryp, syıǵa tartý shartymen Shymkent qalasynyń kommýnaldyq menshigine berý týraly usynys tústi. Shymkent qalasy ákimdiginiń syıǵa tartý shartyn jasasý týraly 2023 jylǵy 5 jeltoqsandaǵy №2714 qaýlysymen «Fosforshylar» saraıy kommýnaldyq menshikke qabyldandy», - dep jaýap berdi qala ákimdigi resmı saýalǵa.

Byltyr 28 jeltoqsanda atalǵan nysan memlekettik tirkeýden ótip, qalalyq bilim basqarmasynyń menshigine tirkelgen.

«Búginde Shymkent qalasy ákimdigi men «Sábı» qorynyń basshylyǵy arasynda mádenı ǵımaratty jańǵyrtý boıynsha yntymaqtastyq týraly memorandýmǵa qol qoıyldy. Qor tarapynan «Fosforshylar» mádenıet saraıy qalpyna keltirilip, qala halqyna syılyq retinde tartý etilmek», - deıdi ákimdikten.

Sondaı-aq, resmı aqparatta ǵımaratty jóndeý jumystary jospar boıynsha bıyl kúzde bastalatyny aıtylǵan.

Eske sala keteıik, byltyr qarashada Shymkentte kóptegen jyldan beri bos turǵan mádenıet úıiniń memleket menshigine ótetindigi týraly habarlaǵan edik.

Ótken jyly jeltoqsanda «Fosforshylar» saraıynda úıindi astynda qalǵan adamnyń denesi tabyldy. Ol týraly qala ákimi habarlady.