Shymkenttegi et bazarlarynda baǵa qubyldy
ShYMKENT. KAZINFORM — Shymkenttegi et kóbine Zabadam shaǵynaýdanynan, sondaı-aq Túrkistan oblysynyń Saıram aýdanyndaǵy Aqsýkent pen Qarabulaq aýyldarynan jetkiziledi.
Sońǵy aptada Shymkenttegi et bazarlarynda sıyr eti shamamen kılogramyna 100 teńgege arzandady. Sarapshylardyń aıtýynsha, bul — Qazaqstannan sıyrlardy syrtqa shyǵarýǵa salynǵan tyıymnyń uzartylýy nátıjesinde qasaphanalardaǵy satyp alý baǵasynyń tómendeýinen týyndap otyr. Degenmen baǵanyń arzandaýy tutynýshylar suranysyn arttyrǵan joq — naryqtaǵy saýda kólemi burynǵy deńgeıde qalyp otyr.
Qalalyq naryqtardaǵy baǵalar qazir mynadaı deńgeıde:
• Sıyr eti — 4 000–5 000 teńge/kg
• Jylqy eti — 3 800–4 800 teńge/kg
• Qoı eti — 3 500–3 800 teńge/kg
• Qazy, rýlet — shamamen 4 500 teńge/kg
• Tartylǵan et — 4 300 teńge/kg
• Baýyr — 800–1 000 teńge/kg
25 jyldan beri et satýmen aınalysyp kele jatqan Mamýrhan Toıchıev baǵanyń tómendeý sebebin bylaısha túsindiredi.
— Sıyr eti sońǵy aptada ár kılogramyna 100 teńgedeı arzandady. Bul — Ózbekstan baǵytyna eksportqa ýaqytsha shekteýdiń áseri. Eger bul shara uzaq merzimge saqtalsa, ishki naryqtaǵy baǵany baqylaýda ustaýǵa múmkindik týady, — deıdi ol.
Bazardaǵy satýshylardyń aıtýynsha, et qunynyń aıtarlyqtaı tómendemeýiniń bir sebebi — jemshóp baǵasynyń joǵary bolýy. Ótken jyly bir tonna shóp 35 myń teńge tursa, bıyl bul kórsetkish 60 myń teńgege jetken. Bul faktor aýyl sharýashylyǵy taýar óndirýshilerine qosymsha salmaq túsirip keledi.
Shymkenttegi et kóbine Zabadam shaǵynaýdanynan, sondaı-aq Túrkistan oblysynyń Saıram aýdanyndaǵy Aqsýkent pen Qarabulaq aýyldarynan jetkiziledi. Satýshylar etti 3 500–3 600 teńgeden satyp alyp, odan ári súıekti, taza etti nemese farsh baǵasyn belgileıdi. Saýda ústemesi shamamen 15%-dy quraıdy.
20 jyldan asa ýaqyt boıy et saýdasynda júrgen Bahtııar Raýpov mal satylymy tómendegenin aıtady.
— Buryn bir aptada segizge deıin mal satatyn edik, qazir eki-úshten aspaıdy. Satyp alýshylardyń kóbi únemdeýge kóshti. Bir-eki kılogramm sıyr etin ǵana alyp, qalǵanyn jylqy etimen tolyqtyrady, — deıdi ol.
Úlken otbasylar úshin tutas jilik alý tıimdirek. Bul bir aılyq qajettilikti jabady jáne dúken men bazardan bólek-bólek satyp alǵannan góri arzanyraq túsedi.
Et qasaphanadan bazar sóresine jetkenshe eki kezeńdi sanıtarlyq tekserýden ótedi. Aldymen — mal soıylǵan jerde veterınar mamandar tekseredi, keıin bazar zerthanasynda bıologııalyq synamalar alynyp, patogender men antıbıotıkterge saraptama jasalady. Oń qorytyndy alynǵan soń ǵana et satylymǵa shyǵarylady.
Qasaphanalarda etti bólý úshin zamanaýı ádister qoldanylady. Ótkir pyshaq pen qýatty jabdyq súıekterdi uqypty kesip, ettiń sapasyn saqtaýǵa múmkindik beredi. Bul tásil ónimniń kórinisi men sapasyn jaqsartady.
Sıyr eti baǵasynyń tómendeýi óńir turǵyndary úshin jaǵymdy jańalyq bolǵanymen, naryqtaǵy suranystyń aıtarlyqtaı ózgermegeni baıqalady. Mamandardyń pikirinshe, jemshóp quny turaqtanbaıynsha, et baǵasy da kúrt arzandaı qoımaıdy.
Bul jaǵdaı aýyl sharýashylyǵy salasyndaǵy turaqtylyq pen baǵa teńgerimin qamtamasyz etý úshin memlekettik qoldaý sharalarynyń mańyzdylyǵyn taǵy da dáleldep otyr.
Aıta keteıik, budan buryn jylqy eti men qoı etine qansha sýbsıdııa tólenetindigin jazǵan bolatynbyz.