Shymkenttegi eki kolledjde 1,3 mlrd teńge jymqyrý isi boıynsha bes adam sottaldy

Sot materıaldaryna sáıkes, oqý oryndarynyń quryltaıshysy Elmıra Dúısenqyzy asa iri mólsherde alaıaqtyq jasaý jáne qylmystyq jolmen alynǵan aqshany zańdastyrý baptary boıynsha kináli dep tanyldy. Buǵan deıingi sottylyǵynyń ótelmegeni eskerilip, ol 10 jylǵa bas bostandyǵynan aıyryldy.

Іs boıynsha qalǵan aıyptalýshylar da qylmysqa sybaılas bolǵany úshin túrli merzimge sottaldy. Atap aıtqanda, kadr bóliminiń basshysy Botagóz Myrzahmetova 6 jyl 6 aıǵa, kolledj dırektory ári qujat júzindegi quryltaıshy Nurgúl Erbakıeva 6 jylǵa, býhgalter Elmıra Saqtaǵanova 6 jylǵa jáne bas býhgalter Ǵalııa Joldasova 4 jylǵa bas bostandyǵynan aıyryldy.

Tergeý dereginshe, 2018 jylǵy tamyzdan 2025 jylǵy maýsymǵa deıin Ońtústik Qazaqstan gýmanıtarlyq-qarjy kolledji is júzinde bilim berý qyzmetin júzege asyrmaǵan. Sonymen qatar Ońtústik Qazaqstan joǵary medıtsınalyq kolledjinde aqyly bólimde bilim alǵan stýdentter jalǵan buıryqtardyń negizinde Ulttyq bilim berý derekter bazasynda memlekettik bilim berý tapsyrysy boıynsha oqıtyn stýdentter retinde zańsyz esepke alynǵan.

Sotta anyqtalǵandaı, osy stýdentterge bólingen bıýdjet qarajaty oqý ornynyń shyǵyndaryn óteýge jáne kommertsııalyq nesıelerdi jabýǵa jumsalǵan. Bul rette stýdentter oqý aqysyn óz qarajatynan tólep kelgen.

Sondaı-aq sot kadr bóliminiń basshysy Botagóz Myrzahmetovanyń Ulttyq bilim berý derekter bazasyna jalǵan málimetter engizip, stýdentterdi qabyldaý týraly jalǵan buıryqtar rásimdegenin anyqtady. Al býhgalterler Ǵalııa Joldasova men Elmıra Saqtaǵanova Elmıra Dúısenqyzynyń tapsyrmasymen shákirtaqy tóleýge qatysty qarjylyq qujattardy rásimdep, bıýdjet qarajatyn aýdarýǵa qatysqan. Kolledj dırektory Nurgúl Erbakıeva jalǵan oryndalǵan jumystar aktilerine qol qoıyp, nesıe rásimdegen.

Sot málimetinshe, qylmystyq shema 2025 jyldyń maýsymyna deıin jalǵasqan.

— Qylmystyq nıetti júzege asyrý maqsatynda jalǵan qujattar rásimdelip, oryndalǵan jumystar aktilerine qol qoıylyp jáne Ulttyq bilim berý derekter bazasyna jalǵan málimetter engizilgen. Nátıjesinde memleketke jalpy somasy 1 mlrd 351 mln 527 myń 344 teńge kóleminde shyǵyn kelgen, — delingen sot habarlamasynda.

Sot Elmıra Dúısenqyzyna qatysty memlekettik organdardyń azamattyq talaptaryn qanaǵattandyrdy. Osy rette Shymkent qalasynyń densaýlyq saqtaý basqarmasynyń paıdasyna 346 mln 315 myń 344 teńge (tergeý barysynda sottalýshylar tarapynan erikti túrde ótelgen 65 mln teńge shegerilgen), Túrkistan oblysy bilim basqarmasynyń paıdasyna 940 mln 212 myń teńge, sondaı-aq memleket kirisine 12 mln 865 myń 273 teńge mólsherinde memlekettik baj óndirildi.

Sondaı-aq Almaty qalasyndaǵy Hilltown Residence kottedj qalashyǵynda ornalasqan turǵyn úı memleket kirisine tárkilendi. Sot bul múlik jymqyrylǵan bıýdjet qarajatyna satyp alynǵan degen qorytyndyǵa keldi. Sonymen qatar Shymkent qalasyndaǵy páterge qoıylǵan tyıym saqtaldy.

Al basqa sottalǵandardyń múlkine salynǵan tyıym alynyp tastaldy, óıtkeni memlekettik organdardyń azamattyq talaptary tek Elmıra Dúısenqyzyna qatysty qoıylǵan.

Budan bólek barlyq bes sottalýshydan jábirlenýshilerge ótemaqy qoryna árqaısysynan — 78 640 teńgeden mindetti tólem óndiriletin boldy.

Sot Elmıra Dúısenqyzyna keltirilgen zalaldy óz erkimen óteý úshin bir aı merzim berdi. Osy ýaqyt ishinde qarajat ótelmegen jaǵdaıda, óndirip alý rásimi sot oryndaýshylary arqyly júzege asyrylady.

Aıta keteıik, Elmıra Dúısenqyzy buǵan deıin de qylmystyq jaýapkershilikke tartylǵan. Ol buryn Ulttyq qaýipsizdik organdarynyń burynǵy qyzmetkerine qatysty is boıynsha para berýge deldal bolǵany úshin sottalǵan. Keıin «Rıana» jekemenshik mektebine qatysty is boıynsha memleketke 278 mln teńge kóleminde zalal keltirgeni úshin 6 jylǵa bas bostandyǵynan aıyrylǵan. Keıin jazasynyń ótelmegen bóligi aıyppulmen almastyrylyp, merziminen buryn bostandyqqa shyqqan bolatyn.

Budan buryn Shymkentte bilim berý uıymdarynda 700 mln teńgeden astam qarjy zańsyz tólengeni týraly jazǵan edik.