Shymkenttegi Dendrosaıabaqta 60 beınekameranyń 40-qa jýyǵy jumys istemeıdi

ShYMKENT. KAZINFORM — Shymkent qalasyndaǵy Dendrologııalyq saıabaqta ornatylǵan 60 beınebaqylaý kamerasynyń 40-qa jýyǵy jumys istemeı tur. Bul týraly saıabaq dırektory Esdáýlet Dostııarov málim etti.

Onyń aıtýynsha, saıabaq táýlik boıy kúzetiledi, alty núktede kúzetshiler kezekshilik atqarady. Sonymen qatar, aýmaq tolyq jaryqtandyrylǵan.

— Bizde 24 saǵattyq kúzet qyzmeti bar. Alty jerde kúzetshiler otyrady. 2024–2025 jyldary jaryq júıesinde aqaýlar bolǵan, búginde tolyq qalpyna keltirildi. Barlyq jaryqsham janyp tur. Beınekameralar da ornatylǵan. Alaıda olardyń birqatary isten shyqqan, — dedi ol.

Dırektordyń málimetinshe, beınebaqylaý kameralaryn merdiger kompanııa ornatqan. Jabdyqtarǵa kepildik merzimi berilgen. Biraq onyń basym bóligi túrli sebeppen turaqty jumys istemegen. Osyǵan baılanysty saıabaq ákimshiligi merdiger kompanııany sotqa bergen. Sot sheshimimen kameralardy qalpyna keltirý mindeti kompanııaǵa júktelgen.

— Jalpy 60 beınekamera bar. Qazirgi tańda shamamen 20-sy jumys istep tur. Qalǵandary isten shyqqan. Keıde ózdiginen qosylyp ketedi. Baǵdarlamalyq qaýipsizdik júıesinde aqaý bolýy múmkin. Sot sheshimi negizinde mamandar kelip, iske qosý jumystaryn júrgizedi. Kepildik merzimi bolǵandyqtan, isten shyqqan kameralardy merdiger kompanııa jóndeýge mindetti, — dedi E.Dostııarov.

Eske salsaq, úsh kún buryn saıabaq aýmaǵynan er adamnyń máıiti tabylǵan edi. Shymkent qalasy Polıtsııa departamenti atalǵan derek boıynsha ózin-ózi óltirýge deıin jetkizý faktisimen sotqa deıingi tergep-tekserý amaldary bastalǵanyn habarlaǵan. Saıabaq ákimshiligi oqıǵa bolǵan aýmaqta ornatylǵan beınebaqylaý kamerasynyń isten shyqqanyn jetkizdi.