Shymkenttegi Dendrosaıabaq ornalasqan jer memleket menshigine qaıtaryldy
ShYMKENT. KAZINFORM – Shymkentte «AMANAT» partııasy janyndaǵy «Jer amanaty» komıssııasynyń aralasýymen dendrosaıabaqtyń 0,29 gektar aýmaǵy memleket menshigine qaıtaryldy. Taıaýda taǵy 0,6 gektar jerdi qaıtarý josparlanýda. Bul týraly komıssııa músheleriniń megapolıs turǵyndarymen kezdesýi barysynda belgili boldy.
«AMANAT» partııasy janyndaǵy respýblıkalyq «Jer amanaty» komıssııasynyń músheleri Shymkent qalasyna baryp, jergilikti turǵyndarmen kezdesti.
A.Asqarov atyndaǵy dendrologııalyq saıabaq – Shymkent turǵyndary men qala qonaqtarynyń súıikti demalys orny. «Jer amanaty» komıssııasy tóraǵasynyń orynbasary Baqytjan Bazarbek atap ótkendeı, buǵan deıin saıabaqtyń keıbir aýmaǵy zańsyz ıelikten shyǵarylǵan edi. 2005 jyly jeltoqsanda qala ákimi 0,2430 gektar jer ýchaskesin úshinshi tulǵaǵa berý týraly qaýly shyǵardy. 2022 jyly mamyrda halyq qalaýlysy dendrosaıabaq ornalasqan jerdi ıelikten shyǵarýdyń zańdylyǵyn tekserý qajet ekenin aıtyp, AShM Jer resýrstaryn basqarý komıtetine ótinish joldady.
«Shymkent qalasynyń Jer resýrstaryn basqarý departamenti Jer telimin berý jáne dendrosaıabaq aýmaǵynyń konfıgýratsııasyn ózgertý kezinde zań buzýshylyqtardy anyqtady. Dendrosaıabaq ákimshiligine ıelikten zańsyz shyǵarylǵan jer ýchaskelerin talap ete otyryp Shymkent qalasy ákimdigi shyǵarǵan sheshiminiń kúshin joıý týraly talap aryz berý qajet ekeni týraly usynys joldandy. Dendrocaıabaq barlyq sot otyrysyn jeńip, zańsyz ıelikten shyǵarylǵan jerler memleket menshigine qaıtaryldy. Burynǵy ákimder qabyldaǵan barlyq zańsyz qaýlylardyń kúshin joıamyz. Biz saıabaqtardyń, gúlzarlardyń jáne basqa da qoǵamdyq oryndardyń jerlerin ıelikten shyǵarýǵa jol bermeımiz», – dedi ol.
«Jer amanaty» tóraǵasynyń orynbasary komıssııa aldaǵy ýaqytta 0,6 gektardan astam jerdi memleket menshigine jáne dendrobaq balansyna qaıtarý úshin saıabaq ákimshiligine sot isi barysynda jan-jaqty qoldaý kórsetetinin jetkizdi.
Budan soń, komıssııa músheleri 2,641 gektar jer aýmaǵy jeke menshikke zańsyz berilgen «Keń baba» qalalyq saıabaǵyna bardy. Partııalyqtar Shymkent qalasy ákimdiginiń osy jer ýchaskesin jeke menshikke berý týraly qaýlysynyń kúshin joıý týraly Jer resýrstaryn basqarý jónindegi komıtetke tekserý is-sharalaryn júrgizý boıynsha ótinish jiberiletinin atap ótti.
Osy kúni «Jer amanaty» komıssııasynyń músheleri úıleri áýejaıdyń sanıtarlyq aımaǵynda ornalasqan Abaı aýdanynyń Qyzyljar turǵyn alabynyń turǵyndarymen kezdesti. Qoldanystaǵy normatıvtik-quqyqtyq aktiler boıynsha nysannyń kúzet aımaǵy 100 metrge deıingi qashyqtyqta bolýy tıis. Oǵan áýejaı mańyndaǵy 139 gektar jer kiredi. Búginde munda 307 turǵyn úı ornalasqan. Alaıda, atalǵan ýchaskelerdi memleket menshigine alý qala bıýdjeti úshin úlken aýyrtpalyq bolmaq. Osyǵan baılanysty Shymkent áýejaıynda sanıtarlyq qaýipsizdikti qamtamasyz etetin jańa ushý-qoný jolaǵyn salý týraly sheshim qabyldandy. Alaıda, jańa jolaq salynatyn aýdanda 50 úıdi buzý qaýpi bar. Komıssııa músheleri halyqqa túsindirý jumysyn júrgizdi.
«Áýejaı mańyndaǵy qarapaıym halyqtyń baspanalary buzylmaıdy. Biz osy másele boıynsha turǵyndardyń pikirin tyńdaý úshin Shymkentke arnaıy keldik. Ortaq sheshimge kelý joldaryn qarastyryp jatyrmyz», – dedi komıssııa tóraǵasynyń birinshi orynbasary Murat Temirjanov.
Byltyr Shymkenttegi «Jer amanaty» komıssııasy jumysynyń arqasynda Kókbulaq turǵyn alabynda aýyl sharýashylyǵy maqsatyndaǵy 603 gektar jer memleket menshigine qaıtaryldy. Sonymen qatar, qala shegindegi jalpy aýmaǵy 1,33 gektardy quraıtyn eki jer ýchaskesi de memleket menshigine qaıtaryldy. Buǵan deıin bul jerler kommertsııalyq kompanııaǵa sharýashylyq maqsatta berilgen edi. Alaıda jerdi paıdalaný merzimi ótip ketti.
Eske sala keteıik, bir jarym jylda el aýmaǵynda 10 mln gektarǵa jýyq jer memleket menshigine qaıtaryldy. Memleket basshysy Qasym-Jomart Toqaev jerdi ádil bólý máselesine erekshe nazar aýdaratynyn atap ótken jón. «AMANAT» partııasy Prezıdenttiń qoǵamdyq tiregi retinde osy mindettiń júzege asýyna qoǵamdyq monıtorıngi júrgizip keledi.
Buǵan deıin respýblıkalyq «Jer amanaty» komıssııasynyń bastamasymen árbir aýyldyq eldi mekendegi jaıylym tapshylyǵy men memleket menshigine qaıtarylǵan jer ýchaskeleriniń tizbesi kórsetilgen jerkarta.gharysh.kz ınteraktıvti kartasy ázirlengen bolatyn.
Eske sala keteıik, jer máselelerin jedel sheshý úshin qazaqstandyqtar «AMANAT» partııasynyń 8 800 080 44 41 «Senim telefony» arqyly zań buzýshylyqtyń barlyq faktisi týraly habarlaı alady. Ótinimder WhatsApp arqyly da +7 700 800 44 41 nómiri boıynsha qabyldanady.
