Shymkenttegi dendrosaıabaq mańynda jasóspirimdi pyshaqtap ketti
ShYMKENT. KAZINFORM — Shymkenttegi dendrosaıabaqta jyljymaly dámhana (fýdtrak) mańynda bolǵan janjal kezinde jasóspirim pyshaqtalyp, aýrýhanaǵa jetkizildi. Oqıǵaǵa qatysty qylmystyq is qozǵaldy.
Oqıǵa 17 tamyz kúni keshki ýaqytta qalalyq dendrosaıabaqtyń kireberisinde bolǵan. Áleýmettik jelilerde janjaldan keıingi jaǵdaı túsirilgen fotosýretter tarady. Jazba avtorynyń aıtýynsha, janjalǵa fýdtrakta jumys isteıtin kámeletke tolmaǵandar qatysqan.
— Keshke Shymkenttegi dendrosaıabaqqa baryp, osyndaı jaǵdaıdy kórdik. Kireberis janyndaǵy kassanyń qasynda fýdtrak qyzmetkerleri bir-birin aıaǵynan pyshaqtap jaralaǵan. Bul ne degen bassyzdyq? Ata-analary men basshylyǵy qaıda qarap otyr? Balalar kámeletke tolmaǵan, eresektersiz, qoldarynda pyshaq bolǵan, — delingen áleýmettik jelidegi jazbada.
Shymkent qalasy polıtsııa departamenti atalǵan derekti rastady. Vedomstvo málimetinshe, dene jaraqatyn salý faktisi boıynsha qylmystyq is qozǵalǵan.
— Oqıǵaǵa qatysýshylar anyqtaldy. Jaraqattanǵan jasóspirim aýrýhanaǵa jetkizildi. Qazir bolǵan jaǵdaıdyń barlyq mán-jaıy, janjaldyń sebepteri anyqtalyp jatyr, — dep habarlady polıtsııa.
Sonymen qatar kámeletke tolmaǵandardyń zańdy ókilderin jaýapkershilikke tartý máselesi qaralyp jatyr.
— Kámeletke tolmaǵandardy tárbıeleý jáne olardyń qaýipsizdigin qamtamasyz etý jónindegi mindetterin tıisinshe oryndamaǵany úshin zańdy ókilderin jaýapkershilikke tartý máselesi qarastyrylyp jatyr. Tekserý qorytyndysy boıynsha barlyq qatysy bar tulǵalardyń áreketine quqyqtyq baǵa berilip, zańnamada kózdelgen sharalar qabyldanady, — dep málimdedi polıtsııa.
Aıta keteıik, buǵan deıin Mańǵystaý oblysynda eki jasóspirimniń mektep oqýshysyn uryp-soǵýyna baılanysty qylmystyq is qozǵalǵan edi. Oqıǵaǵa qatysýshylar bolǵan jaǵdaıdy uıaly telefonmen vıdeoǵa túsirgen.
