Shymkenttegi Badam ózeni jaǵasynda qum men qıyrshyq tas zańsyz óndirilip kelgen

ShYMKENT. KAZINFORM — Áleýmettik jelilerde taraǵan beınejazbalarda ekskavatorlardyń jumys istep jatqanyn jáne aýyr júk kólikteriniń qumdy qurylys alańyna qaraı tasyp jatqanyn kórýge bolady.

Shymkent qalalyq ekologııa departamentiniń málimetinshe, beınejazbalar quqyq qorǵaý organdaryna joldanyp, Qazaqstan Respýblıkasy Qylmystyq kodeksiniń 332-baby («Jer qoınaýyn qorǵaý erejelerin buzý») jáne 334-baby («Jer qoınaýyn óz betinshe paıdalaný») boıynsha beımálim tulǵalardy qylmystyq jaýapkershilikke tartý jóninde talap qoıylǵan.

— Tergeý barysynda belgisiz tulǵalardyń Badam ózeniniń soltústik jáne ońtústik jaǵalaýlarynda, Shardara kóshesiniń boıynda qum men qıyrshyq tas qospasyn óndirgeni anyqtaldy. Materıaldar júk kólikterine tıelip, Abaı aýdany Yntymaq shaǵynaýdanyndaǵy Ál-Farabı kóshesindegi jer ýchaskesine tasylǵan. Tekserý nátıjeleri boıynsha protsessýaldyq sheshim qabyldanady, — delingen qalalyq prokýratýra aqparatynda.

Ákimdik málimetinshe, atalǵan materıaldar jetkizilgen jer ýchaskesi jeke kásipkerge tıesili jáne oǵan jerge memlekettik akt berilgen. Alaıda bul qujatta tek balyq sharýashylyǵyn júrgizýge ruqsat kórsetilgen, jer qoınaýyn paıdalanýǵa quqyq berilmegen. Osyǵan baılanysty ýchaskeni paıdalaný quqyǵyn qaıta qaraý nemese ony toqtatý máselesi týyndaýy múmkin.

Qazirgi tańda Shymkent aýmaǵynda resmı túrde tirkelgen 14 jer qoınaýyn paıdalanýshy bar. Qala respýblıkalyq mańyzǵa ıe mártebe alǵannan keıin taǵy 24 kompanııanyń lıtsenzııalary qaıtarylyp alynǵan.

Aıta keteıik, budan buryn Mashat asýynda júk kóligi jol apatyna ushyrap, Taraz — Shymkent trassasyn jaýyp tastaǵanyn jazǵan bolatynbyz.