Shymkenttegi aýrýhanada naýqastar dálizde jatqan
ShYMKENT. KAZINFORM — Shymkent qalasyndaǵy juqpaly aýrýlar aýrýhanasynda dálizde jatqan naýqastar beınelengen vıdeo tarap, qoǵamda qyzý talqylandy. Beınejazbada kórsetilgendeı, naýqastar tipti dálizde tósekte emes, jerde jatqan.
Qala ákimdigi bul jaǵdaıǵa qatysty túsinikteme berip, másele aýrýhanada júrgizilip jatqan kúrdeli jóndeý jumystaryna baılanysty ekenin habarlady.
— Qalalyq juqpaly aýrýlar aýrýhanasynda kúrdeli jóndeý jumystaryna baılanysty 10 bólimsheniń 8-i táýlik boıy asa qaýipti jáne túrli juqpaly aýrýlarǵa shaldyqqan naýqastardy qabyldap, medıtsınalyq kómek kórsetip jatyr. Aýrýhanada 2, 3 jáne 4 oryndyq palatalar bar. Ár palata sanıtarlyq bólmemen qamtamasyz etilgen. Sanıtarlyq-epıdemıologııalyq talaptarǵa sáıkes, bólmelerde aýa almasýyn qamtamasyz etetin terezeler men ishki jeldetý júıesi ornatylǵan. Naýqastarǵa QR medıtsınalyq kómek kórsetý standartyna saı ýaqytyly jáne tolyq kólemde dıetalyq taǵam usynylady, — delingen Shymkent qalasy ákimdiginiń resmı málimdemesinde.
Sondaı-aq dárigerler men medıtsına qyzmetkerleri bekitilgen hattama negizinde qyzmet atqaryp, sanıtarlyq normalardyń saqtalýyn turaqty baqylaýda ustap otyr. Tósek-oryn jabdyqtary epıdemıologııalyq maýsymǵa jetkilikti.
Resmı málimetke sáıkes, sońǵy demalys kúnderi naýqastardyń kóp túsýine ári palata jetispeýshiligine baılanysty dálizge ornalastyrylǵan.
— Dárigerler men medıtsına qyzmetkerleri tarapynan etıka men deontologııa qaǵıdalarynyń buzylý derekteri tirkelgen joq. Dárigerler men medbıkelerdiń sany ulǵaıtylyp, túsindirý jumystary júrgizilip jatyr. Qazirgi tańda turaqty jaǵdaıdaǵy naýqastar ambýlatorlyq emge shyǵarylyp, palatalar bosatyldy. Dárigerler ár naýqasqa em barysy men densaýlyǵyna qatysty tolyq aqparat berip otyr, — dedi qala ákimdiginiń ókilderi.
Eske sala keteıik, buǵan deıin Shymkentte esirtki boıynsha esepte turǵan 7 azamat medıtsınalyq tekserýden ótpegenin jazǵan edik.