Shymkenttegi attraktsıondar parkiniń aýmaǵyna turǵyn úı kesheni salynbaıdy — ákimdik

ShYMKENT. KAZINFORM — Shymkent qalasynyń ortalyǵyndaǵy burynǵy «Qııal álemi» attraktsıondar parki aýmaǵynda turǵyn úı kesheniniń salynatyny týraly taraǵan aqparat rastalmady. Bul týraly qalalyq ákimdik resmı málimdeme jasady. 

Ákimdiktiń baspasóz qyzmetiniń málimetinshe, atalǵan ýchaskede kópqabatty turǵyn úı emes, zamanaýı jáne qoljetimdi qalalyq saıabaq ashý josparlanyp otyr. Bul aýmaq -  turǵyndardyń demalysy men bos ýaqytyn tıimdi uıymdastyrýǵa arnalǵan qoǵamdyq abattandyrý aımaǵy.

— Bul jerdi qoljetimdi ári jaıly qalalyq saıabaq jasaýǵa nıettimiz. Keıbireýler aıtyp júrgendeı, turǵyn úı kesheni salynbaıdy. Jańa park qala turǵyndary oılaǵannan da áserli bolady dep senemiz, — dep málimdedi ákimdiktiń baspasóz qyzmeti.

Al, búgingi ótken brıfıngte qala ákiminiń orynbasary Sársen Quranbek saıabaqqa qatysty pikir bildirdi.

— Nege ekenin bilmeımin, qala ákimi aýysqanǵa deıin bul ǵımarattarǵa da, attraktsıondarǵa da eshkim nazar aýdarmaǵan. Biz nazar aýdardyq. Sotqa júgindik. Sottyń sheshimi boıynsha bastapqy qalpyna keltirý boıynsha sheshim qabyldandy. Aqpan aıynyń ishinde «Aıgerim» JShS-ne zańsyz turǵan, eshqandaı tehnıkalyq qujattary joq ǵımarattar men attraktsıondardyń buzylatyndyǵy týraly sottyń sheshimi hatpen joldandy. Al onda 9 ǵımarat bar eken. Olardyń ıelerimen «Aıgerim» JShS-nyń quryltaıshylary men basshylyǵy baılanys qurý kerek. Olar ony habarlady ma, joq pa bizge beımálim. Ol kisilerde «Aıgerim» JShS-men jasalǵan kelisim-shartta bolmaǵan. Salyq ta durys tólenbeı kelgen. Úsh márte órt boldy, attraktsıondardy paıdalaný barysy kisi ólimine alyp keldi, — dedi Sársen Quranbek.

Sondaı-aq, ol qaladaǵy saıabaqtar halyq úshin qyzmet etetindigin jetkizdi.

— Zań buzý bolyp jatqan dúnıege kózimizdi jumyp qarap otyrýǵa tıisti emespiz. Biz memleket pen eldiń aldyndaǵy mindetimizdi oryndaýymyz kerek. Oryndap ta jatyrmyz. Qaladaǵy parkterdiń barlyǵyn bastapqy qalpyna keltirip, qoǵamdyq keńistikke aınaldyryp, turǵyndar men qonaqtar úshin jaıly orta quramyz. Qalalyq ákimdiktiń balansynda bolady. Halyq úshin qyzmet etedi, — dedi Sársen Quranbek.

Aıta keteıik, budan buryn Shymkenttegi «Qııal álemi» saıabaǵynda zańsyz salynǵan ǵımarattardy buzý bastalǵanyn jazǵan bolatynbyz. Qala ortalyǵyndaǵy shamamen tórt gektar jer tazartylyp, bastapqy qalpyna keltirilýi tıis.