Shymkenttegi assambleıa músheleri 10 mln teńge men 20 tonna gýmanıtarlyq kómek jiberdi
ShYMKENT. KAZINFORM - Qazaqstan halqy Assambleıasynyń Shymkent qalasyndaǵy shtaby «Júrekten júrekke» aktsııasy aıasynda 10 mıllıon teńge men 20 tonna zat jınap, Atyraý oblysyna jiberdi. Búginde assambleıa músheleri gýmanıtarlyq kómektiń ekinshi legin jınap, sý tasqynynan zardap shekken aımaqtarǵa jóneltýge daıyndap jatyr.
Búgingi tańda Shymkentte eki gýmanıtarlyq kómek qabyldaý ortalyǵy jumys istep tur. Birinshisi, «Dostyq» úıinde bolsa, ekinshisi «Araı» JShS aýmaǵynda ornalasqan. Shymkent qalasynyń árbir turǵyny azyq-túlik, kıim-keshek sekildi kúndelikti tutyný taýarlaryn alyp kelip, ótkize alady.
«Shymkenttikter «Júrekten júrekke» aktsııasyna belsendi túrde qatysýda. Keshegi kúni bir turǵyn bir qap kartop berip ketse, ekinshi adam sábiz alyp kelip tabystady. Barlyǵynyń maqsaty - jaqsylyq jasaý. Biz sý tasyǵan aımaqtaǵy áriptesterimizben jıi baılanysqa shyǵyp, qandaı zattar kerek ekendigin de anyqtap, soǵan qaraı jumys isteýdemiz. Máselen, qazir gıgıenalyq zattar men azyq-túlik, rezeńke etik pen arnaıy kıimder qajet. Osyǵan oraı bizde sol zattardy meılinshe kóp jınaqtaýdamyz»- deıdi, sý tasqynynan zardap shekken aımaqtarǵa kómek kórsetý jónindegi shtab basshysynyń orynbasary, Shymkent qalasynyń «Ózbek» etnomádenı ortalyǵynyń tóraǵasy Tahırbek Nıshanbaev.
