Shymkenttegi alapat órt sóndirilip, 10 adam medıtsınalyq kómekke júgindi

ShYMKENT. KAZINFORM – Shymkentte «Ordabasy» ındýstrııalyq aımaǵynda shyqqan órt sóndirildi. 10 adam zardap shegip, medıtsınalyq kómegine júgingen. 

Oqıǵa keshe saǵat 11.35-te bolǵan. Indýstrııalyq aýmaqta tehnıkalyq gaz kúkirti tutanyp, órtke ulasqan. Órt 1 200 sharshy metr aýmaqty sharpyǵan. Oqıǵa kezinde órt shyqqan aýmaqtaǵy «Daewoo Jentra» markaly jeńil avtokólik órtendi. 

«Shaqyrtý boıynsha oqıǵa ornyna kelgen órt sóndirýshiler ashyq kúkirttiń janyp jatqanyn anyqtady. TJM kúshterimen órt sóndirý jumystary júrgizildi. Oqıǵa ornyna QTJ órt sóndirý poıyzy, jergilikti atqarýshy organ, sanıtarlyq-epıdemıologııalyq baqylaý departamenti jáne ekolog mamandar jumyldyryldy. TJM qutqarýshylary jergilikti atqarýshy organmen birlesip, ınertti materıaldardy tóseý jáne gazsyndandyrý jumystaryn júrgizdi. Kúkirttiń totyǵýy qyzyl jalyndy sóndirý jumystary kezinde qıyndyqtar týyndatty», - dedi Shymkent qalalyq TJD daǵdarys jaǵdaılary basqarmasynyń jedel kezekshisi, azamattyq qorǵaý kapıtany Erdos Ahmetov. 

Polıtsııa qyzmetkerleri yqtımal zaqymdaný aımaǵyna qorshaý júrgizip, órt ornynan SES qyzmetkerleri synama alǵan. Onyń qorytyndysy kútilýde. 

Jaqyn mańdaǵy Shańyraq shaǵynaýdanynyndaǵy turǵyn úılerden (barlyǵy 412 úı, 2 472 adam turady) evakýatsııa pýnktine 443 adam evakýatsııalandy, onyń ishinde 233 bala (barlyǵy 23:20-da úılerine jáne týystaryna ketti). 

TJD málimetinshe, órt ornynan kúıik jáne ýlaný belgileri bar 10 adam (1 kúıik, 9 ýlaný) medıtsınalyq kómekke júgindi. Dárigerler tekserýinen keıin 2 adam aýrýhanaǵa jatqyzyldy, qalǵan 8 adam jaǵdaıy qalypty bolýyna baılanysty úılerine qaıtaryldy. 

Órt 28 shilde 00:36-da oqshaýlandy jáne 05:01-de tolyǵymen sóndirildi. Qazirgi tańda órttiń shyǵý sebebi anyqtalyp jatyr. Tilsiz jaýmen kúresýe jalpy sany 700-den astam adam, 129 tehnıka jáne 1 órt sóndirý poıyzy jumyldyryldy. Budan bólek Túrkistan oblysy Tótenshe jaǵdaılar departamentiniń órt sóndirýshileri de kómekke kelgen. 

Jalyn tolyq sóndirilgenshe oqıǵa ornynda qala ákimi Ǵabıt Syzdyqbekovtiń basshylyǵymen jedel shtab uıymdastyrylǵan. Pılotsyz ushý apparattarynyń kómegimen aerovızýaldy tekserý júrgizildi. 

Qalalyq ákimdiktegiler mamandar áli de oqıǵa ornynda júrgenin, qajet bolǵan jaǵdaıda yqtımal zardaptyń aldyn alý jáne tolyq qaýipsizdikti qamtamasyz etý úshin barlyq qajetti sharalardy qabyldaıtynyn atap ótti.