Shymkenttegi ákimdik ǵımaratyndaǵy órtten qujattar búlingen joq – Sársen Quranbek

ShYMKENT. KAZINFORM – Shymkent qalasynyń Abaı aýdany ákimdiginde bolǵan órt saldarynan qujattar búlingen joq. Bul týraly qala ákiminiń orynbasary, ákimdik apparatynyń resmı ókili Sársen Quranbek málimdedi.

Onyń aıtýynsha, tótenshe jaǵdaı qyzmetiniń órt sóndirýshileri der kezinde áreket etip, jalyndy tolyq sóndirgen.

– Órt shatyrdan ary jaıyla qoıǵan joq. Birde-bir qujat órtengen joq. Tek 10-ǵa jýyq kompıýter sý bolǵan. Zardap shekkender men oqys jaǵdaıǵa tap bolǵandar joq. Qazirgi tańda saraptama jáne tekserý jumystary júrgizilip jatyr. Osydan keıin órttiń shyǵyny men ǵımaratty qalpyna keltirý sharalary boıynsha arnaıy esep daıyndalady, – dedi Sársen Quranbek.

Órt shyqqan ǵımaratta Abaı aýdany ákimdigi men QR Memlekettik qyzmet isteri agenttiginiń Shymkent qalasy boıynsha departamenti ornalasqan bolatyn. Qazir aýdan ákimdigi «AMANAT» partııasynyń ǵımaratyna ýaqytsha qonystansa, Memlekettik qyzmet ister agenttiginiń qalalyq departamenti Táýke han dańǵyly №6 mekenjaıyna kóshirildi.

– Qazirgi tańda eki mekemeniń de jumysy qalypty rejımde istep tur. Eshqandaı kedergiler joq, – dep atap ótti Sársen Quranbek.

Aıta keteıik, budan buryn Shymkentte Abaı aýdany ákimdiginiń ǵımaraty órtengenin jazǵan bolatynbyz.