Shymkenttegi 135 jyldyq tarıhy bar meshit buzylmaıdy – Muhamedjan Estemirov
ShYMKENT. KAZINFORM – Ǵasyrdan astam ýaqyt boıy saqtalǵan kóne ǵımarattyń mereıtoıy taǵylymdyq jáne tanymdyq is-sharalarmen atalyp ótedi.
Áleýmettik jelide Shymkent qalasyndaǵy kóne meshittiń buzylyp jatqany týraly vıdeo tarady.
Onda ǵıbadat úıiniń aýmaǵynda arnaıy tehnıka jumys istep júrgenin kórýge bolady.
Vıdeo avtory da eski qala aýmaǵyndaǵy meshittiń buzylyp jatqanyn aıtqan.
Atalǵan máseleniń mán-jaıyn túsindirgen Shymkent qalasy bas ımamynyń orynbasary Muhamedjan Estemirov 135 jyldyq tarıhı bar nysannyń buzylmaıtynyn jetkizdi.
«Shymkent qalasynyń eski qala aýmaǵynda ornalasqan meshittiń tarıhı tereń. Ǵasyrdan astam ýaqyt boıy saqtalyp kele jatqan ǵımarat buzylmaıdy. Qaıta jan-jaǵyn rettep, zaman talabyna sáıkestendirý jumystary júrip jatyr. 1990 jyldary salynǵan qasyndaǵy qosymsha ǵımarattar buzylyp jatyr. Sebebi, tehnıkalyq syny men syry ketkendikten, apatty dep tanylǵan bolatyn. Onyń ornyna jańa oqý korpýsy salynady. Avtoturaq ornalasady. Jańa nysandardyń qurylysy da kóp uzamaı bastalady. Munyń bári — qalaǵa kelgen týrıster men meshit qaýymyna jaǵdaı jasaý maqsatynda qolǵa alynyp jatqan is» — dedi ol.
Sondaı-aq, Muhamedjan Estemirov bıyl eski qalashyqtaǵy kóne meshittiń 135 jyldyq mereıtoıy tanymdyq jáne taǵylymdyq sharalarmen atalyp ótetinin jetkizdi.
Aıta keteıik, Shymkent qalasynda ornalasqan kóne meshitti 1889 jyly Shyńǵysbaı qajy Dáýituly saldyrǵan.
HH ǵasyrdyń birinshi jartysyndaǵy tirkeý, ujymdastyrý kezeńderinen Uly Otan soǵysy aıaqtalǵansha meshit áskerı kazarma, mılıtsııa úıi retinde paıdalanyldy.
Al 1947 jyly el ıgiligine qaıtaryldy.
Meshittiń syıymdylyǵy — 2000 adam, úlken munarasynyń bıiktigi — 12 metr, al kúmbeziniń bıiktigi — 6 metr.
Meshitke ótken jyly kúrdeli jóndeý jumystary júrgizilgen bolatyn.
