Shymkenttegi 13 sarbazdyń ýlanýy: sottalýshyǵa raqymshylyq jasaldy
ShYMKENT. KAZINFORM — Qylmystyq ister jónindegi mamandandyrylǵan aýdanaralyq sotynda № 6506 áskerı bólimi sarbazdarynyń jappaı ýlanýyna qatysty isti qaraý aıaqtaldy.
Oqıǵa osy jyldyń qańtar aıynda bolǵan. Túski astan keıin sarbazdardyń densaýlyǵy kenet nasharlap, ishi aýyryp, júregi aınyp, ishi ótken. 13 sarbaz medıtsınalyq kómekke júginip, olarda ishek ınfektsııasy anyqtalǵan.
Sanıtarlyq-epıdemıologııalyq qyzmetiniń tekserýi kezinde ashana ydystary men jabdyqtarynyń nashar dezınfektsııalanǵany anyqtaldy. Ashana meńsherýshisi dezınfektsııalyq eritindiniń kontsentratsııasyn úsh esege deıin azaıtqan.
— 27 qańtarda saǵat 07.00 shamasynda A.Qozybaqova № 6506 áskerı bóliminiń ashanasynda as úı jabdyqtaryn tazartý jáne dezınfektsııalaý úshin sýǵa «Deo-Hlor» dezınfektsııalyq zatyn standartta belgilengen shamadan az mólsherde eritip, alynǵan eritindini ydys-aıaq pen as úı ydystaryn óńdeýge paıdalanǵan. Sonyń saldarynan zattar durys dezınfektsııalanbaǵan, bul sanıtarlyq-gıgıenalyq normalardyń buzylýyna jáne abaısyzdan áskerı qyzmetkerlerdiń jappaı aýrýǵa shaldyǵýyna ákep soqty, — dep habarlandy sotta.
Sottalýshyǵa QR Qylmystyq kodeksiniń 304-babynyń 1-bóligi (Abaısyzda adamdardyń jappaı syrqattanýyna, aýrý juqtyrýyna, sáýlelenýine nemese ýlanýyna ákep soqqan buzý) boıynsha aıyp taǵyldy.
Sot otyrysynda Qozybaqova óz kinásin moıyndamaı, keıbir sarbazdardyń aldyńǵy kúni eńbek demalysynda bolǵanyn jáne bólimsheden tys jerde tamaqtanýy múmkin ekenin aıtty.
Zardap shekken sarbazdardyń barlyǵy oqıǵanyń mán-jaıyn rastap, alaıda syrqattan tolyq aıyqqandaryn jáne basshyǵa shaǵymdary joqtyǵyn jetkizdi.
Sot Qozybaqovany kináli dep tanydy. Biraq raqymshylyq zańyn qoldana otyryp, bir jyl merzimge tamaqtandyrý salasynda jumys isteýge tyıym salyp, ony negizgi jazadan bosatty.
Úkim áli zańdy kúshine engen joq. Taraptar sheshimge shaǵymdanýǵa quqyly.
Apta basynda Arqalyqtaǵy jappaı ýlanýdyń sebebi anyqtalǵany týraly jarııaladyq. Jergilikti meıramhanada ótken merekelik sharada 86 adam ishek ınfektsııasyn juqtyryp, olardyń basym bóligi aýrýhanaǵa jatqyzyldy.