Shymkentte júrgizýshiler gaz quıý beketterinde kezek kútýge májbúr
ShYMKENT. KAZINFORM — Shymkent qalasynda avtokólik ıeleri gaz quıý beketterinde jıi kezekte turatynyn aıtyp, shaǵymdandy.
Osyǵan qatysty Kazinform tilshisiniń saýalyna Shymkent qalasynyń energetıka jáne ınfraqurylymdy damytý basqarmasy basshysynyń m. ý. a. Ilıas Esjanov jaýap berip, jaǵdaıdy túsindirdi.
— Avtokólik júrgizýshileriniń shaǵymy negizinde qaladaǵy gaz quıý beketterine baryp, arnaıy monıtorıng júrgizdik. Búginde Shymkentte 4 gaz toltyrý stantsııasy jáne 203 avtogaz quıý stantsııasy jumys isteıdi. Kezek kútý jaǵdaılary negizinen qalanyń shyǵaberistegi beketterinde bolyp jatyr, bárinde emes. Sebebi úlken megapolıs bolǵan soń, kelip-ketip jatqan kólikter kóp. Júk kólikteri men taksı júrgizýshileri kóbine qaladan shyǵar kezde toqtap, qamdanady. Mysaly, úlken júk kóligi jeńil kóliktiń mólsherinen 2-3 ese kóp gaz quıady. Taǵy bir sebebi, zaýyttan jetkizý barysyndaǵy keshigý nemese kepteliske de baılanysty. Degenmen, bul — ýaqytsha másele, qazir jaǵdaı turaqtalyp keledi, — dedi ol.
Qala ákimdigi qazirgi ýaqytta avtogaz quıý stantsııalary qalypty rejımde jumys istep turǵanyn jáne gaz tapshylyǵy joq ekenin málim etti.
— 2025 jylǵy 9 jeltoqsandaǵy jaǵdaı boıynsha qalada táýliktik suıytylǵan munaı gazynyń (SMG) qory — 453 tonna. Shymkentte SMG satýmen aınalysatyn 44 kásipkerlik sýbekt tirkelgen. Óndirýshi zaýyttardan jetkizý kólemi josparǵa saı oryndalyp jatyr. Qaladaǵy suıytylǵan gazdyń ortasha baǵasy — lıtrine 102 teńge, — delingen qala ákimdigi usynǵan aqparatta.
Vedomstvonyń habarlaýynsha, 4-toqsandaǵy avtogaz jetkizý kólemi qazanda — 7043 tonna, qarashada — 8410 tonna (onyń ishinde qosymsha 500 tonna), al jeltoqsanda — 8959 tonnany kórsetken.
Bıyl qala boıynsha bir aıdaǵy ortasha qajettilik jumys isteıtin 44 gaz jelilik uıymdy qamtyǵanda 12 000 tonna shamasynda bolǵan.
Shymkent qalalyq Polıtsııa departamentiniń málimetinshe, 2024 jyly qalada 463 myńnan astam kólik tirkelgen, olardyń 66 myńnan astamy (14,3%) suıytylǵan gaz qoldanady. 2022 jylmen salystyrǵanda avtogazben júretin kólikter sany 34%-ǵa artqan.
Budan buryn Shymkentte avtokólik ıeleri gaz tapshylyǵyna shaǵymdanǵanyn jazǵan edik.