Shymkentte júrgizýshi kýáligin zańsyz berýmen aınalysqan top ustaldy

ShYMKENT. KAZINFORM – Qarjylyq monıtorıng agenttiginiń Shymkent qalasy boıynsha departamenti prokýratýranyń úılestirýimen júrgizýshi kýálikterin júıeli túrde zańsyz berýmen aınalysqan uıymdasqan qylmystyq toptyń áreketin toqtatty.

Tergeý barysynda 2023-2024 jyldary «Azamattarǵa arnalǵan úkimet» memlekettik korporatsııasynyń №2 mamandandyrylǵan halyqqa qyzmet kórsetý ortalyǵynyń basshylyǵy J.Mýrashımov pen birge birqatar laýazymdy tulǵalar júrgizýshi kýálikterin alý rásimin teorııalyq jáne praktıkalyq emtıhandardan ótpeı zańsyz alý shemasyn uıymdastyrǵany anyqtaldy.

- Atalǵan «qyzmet» úshin azamattardan 150 myńnan 400 myń teńgege deıin aqsha alynǵan. Nátıjesinde 500-den astam adam zańsyz jolmen júrgizýshi kýáligin alǵan.

Qazirgi tańda tergeý aıasynda 200 mln teńgeden astam somaǵa baǵalanǵan kúdiktilerdiń múlkine - 2 jeke úı, 2 páter, 2 jer telimi jáne 10 avtokólikke tárkileý maqsatynda tyıym salyndy.

Sottyń sanktsııasymen 12 kúdiktige qatysty qamaýǵa alý túrindegi bultartpaý sharasy qoldanyldy, - dep jazdy Qarjylyq monıtorıng agenttiginen.

Qylmystyq is boıynsha sotqa deıingi tergeý jalǵasýda.

QR Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıdy.

Aıta ketý kerek, júrgizýshi kýálikterin belgilengen tártipti aınalyp ótip alý – qoǵamdyq qaýipsizdikke tikeleı qater tóndiredi.

Bul Shymkent qalasynda sońǵy jyldary jıilegen jol-kólik oqıǵalarynan da baıqalady. 2022 jyly mundaı oqıǵalar sany 398 bolsa, 2024 jyly 878-ge jetken.

Buǵan deıin Shymkentte qoǵamdyq kólikter «tólem» júıesinen ajyratylatyny habarlandy.